Catro alumnos dun instituto de Maceda acceden ao correo e ás contas bancarias dun profesor a través da rede interna do centro

Catro alumnos dun instituto de formación profesional de Maceda permanecen investigados xunto a outro home alleo ao centro por entrar de forma ilegal nas contas bacarias e de correo electrónico dun profesor.

Estas cinco persoas, entre as que hai catro menores de idade, empregaron a rede interna do centro para acceder de forma irregular ás contas deste docente, segundo trasladou a Garda Civil. Os investigados ingresaron nas contas, tanto privadas como profesionais, do profesor a través de computadores do propio centro e tamén desde equipos alleos ao instituto.

Trátase de catro menores de idade, todos eles alumnos do centro, e dun quinto, maior de idade e amigo dun dos membros do instituto. A todos eles impútanselles un delito contra a intimidade, dereito á propia imaxe e inviolabilidade do domicilio. As dilixencias instruídas foron remitidas ao Xulgado de Instrución de Garda de Ourense e á Fiscalía de Menores da Audiencia Provincial de Ourense.

Investigan a catro alumnos dun instituto de Maceda por acceder ao correo e contas bancarias dun profesor | Fonte: GARDA CIVIL