A Xunta reivindica a aposta de creación de servizos no rural en Galicia

A conselleira de Política Social e Xuventude, Fabiola García, participou este martes na mesa redonda baixo o título 'Abordar os retos demográficos nas zonas rurais', organizada polo Comité Europeo das Rexións (CDR) na Rioxa, onde reivindicou a aposta da Xunta pola creación de servizos no rural.

Neste sentido, Fabiola García puxo en valor a posta en marcha en 2016 das primeiras casas niño, un recurso de conciliación totalmente gratuíto para nenos de 0 a 3 anos e que nestes momentos "xa chega a case un centenar de municipios galegos". De igual modo tamén en 2018 apunta que se completou a "creación das primeiras casas do maior para a atención diúrna das persoas maiores". 

A conselleira tamén lembrou que Galicia é pioneira ao aprobar en 2021 a primeira Lei de Impulso Demográfico de España. Trátase dunha normativa que "blinda todas as medidas destinadas a frear a perda de poboación e garantir a igualdade de oportunidades entre territorios, unha cuestión que afecta especialmente á comunidade, marcada pola dispersión territorial".

Outra das cuestións contemplada na lei, sinalou, e que situou á comunidade como "referente na conciliación e na aposta pola etapa 0 a 3 anos" foi a gratuidade de todas as escolas infantís, independentemente da súa titularidade. Tal e como recollen no comunicado, trátase dunha medida que beneficia a 31.000 familias de toda a xeografía galega e que "facilita a todos os pais e nais levar aos seus fillos a un destes centros sen pagar nada pola atención educativa".