'Domingos' deixa máis de 1.000 incidencias no que vai de fin de semana: ríos desbordados, árbores caídas e estradas cortadas
Alerta laranxa en todo o litoral galego por fortes ventos e ondas e alerta amarela por choivas para este domingo.
Por Europa Press / Redacción | SANTIAGO DE COMPOSTELA | 05/11/2023 | Actualizada ás 11:54
A borrasca 'Domingos' deixou en Galicia un reguero de incidencias. En total 1.166, entre as 18.00 horas do venres e as 06.00 horas deste domingo, ríos desbordados, árbores caídas e estradas cortadas. Segundo informou o 112, nas últimas 12 horas rexistraron 360. O problema máis recorrente durante esta xornada de meteoroloxía adversa foi de casos relacionados cos fortes ventos e choivas (659).
As tarefas de prevención de risco por parte dos servizos de emerxencias suman 140, os postes e cables nas vías de circulación 107 e 38 incidentes relacionados cos restos de accidentes e derrubes de terra e pedra. Con todo, tamén houbo inundacións en estradas (34), derrubamentos (23), alagamentos en vivendas (14) e as balsas de auga (11).
POR PROVINCIAS
A provincia de Pontevedra sumou 438 incidencias e a da Coruña 358. Pola súa banda, en Lugo (228) e Ourense (141) os efectos do temporal foron máis moderados. En canto aos concellos, os máis afectados situáronse nas provincias atlánticas. Así, na provincia de Pontevedra, Vigo rexistrou 47, Lalín (30), Pontevedra (25) e A Estrada (23). Na da Coruña, Narón (32), A Coruña (19) e Santiago (17). En Lugo sobresaen Palas de Rei (11) e Lugo (17), e en Ourense, O Carballiño (11) e Celanova (6).
CAÍDA DE ÁRBORES
Nas últimas doce horas, os incidentes máis destacados fan referencia á caída de árbores nas estradas e rexistráronse varios accidentes de circulación deste tipo. A maioría, sen producirse danos persoais, como ocorreu no quilómetro 31 da OU-531, en Ramirás, na N-120 ao seu paso por Pantón e na parroquia santiaguesa de Aríns.
Por outra banda, un condutor necesitou asistencia sanitaria despois de caer unha rama sobre o seu coche cando circulaba polo quilómetro 29 da OU-531, en Celanova. O home puido saír ao exterior polos seus propios medios. En Rubiáns, Vilagarcía, árbore de grandes dimensións caeu sobre un turismo estacionado no que había xente dentro, pero non houbo que lamentar persoas feridas.
Tamén, as árbores e ramas produciron incidencias no tráfico en vías como a A-55 (Vigo), a AG-46 (Moaña), a N-120 (Quiroga), a LU-540 (Viveiro), a AG-64 (Narón), a PO-221 (Campo Lameiro), a N-642 (Burela) ou a N-634 (Guitiriz). A maioría foron avisos de particulares que se atopaban con árbores obstaculizando polo menos un dos carrís de circulación.
CAÍDAS DE PARTES DE FACHADAS
Na tarde do sábado tamén houbo varias incidencias relativas á caída de partes de fachadas á rúa. No municipio pontevedrés de Moaña, na rúa de Ramón Cabanillas, un particular alertou dunhas chapas dun edificio que estaban a piques de desprenderse. En Xubia, na localidade coruñesa de Narón, tamén houbo avisos similares xa que caeron anacos da parede exterior dun inmoble sen causar danos persoais. Tamén na Coruña varios particulares informaron de cascotes que caeron na estrada na rúa de San Amaro.
O vento rexistrado nas últimas horas, que chegou a alcanzar refachos de 183km/h en Lugo, afectou os tellados dalgunhas vivendas. Así, na localidade coruñesa de Noia unha cuberta caeu á beirarrúa e causou danos en coches estacionados na rúa de Brasil. Na mesma localidade, un particular indicou que lle saíu voando o tellado da terraza e que esta comezaba a alagarse. Ocorreu na rúa República Arxentina.
BALSAS DE AUGA, INUNDACIÓNS E CORTES DE LUZ
As choivas tamén produciron incidencias nas que foi necesaria a intervención dos servizos de emerxencias. En Oubiña, pertencente á localidade pontevedresa de Cambados, un vehículo quedou bloqueado no medio dunha balsa de auga, e en Ribadumia un home foi auxiliado por Protección Civil.
Este último alertou directamente á central de emerxencias de que estaba nunha estrada alagada e que o nivel da auga chegáballe á porta. Finalmente, conseguiu saír do vehículo polos seus propios medios. O desbordamento dun río provocou a inundación de varios baixos comerciais e do centro urbano de Caldas de Reis. Tamén sucedeu en Salceda de Caselas, Ponte Caldelas, Pontevedra, Arbo ou Padrón.
Así mesmo, a meteoroloxía adversa deixou varias zonas de Galicia sen luz, como Ferrol, Marín, Narón, en Lourizán, Folgoso do Courel, Cuntis, Vigo ou O Pino. No Pino un particular alertou ao 112 de que caera un raio nunha torre de alta tensión o que deixou sen luz á área da Ponte Carreira. En Mos rexistrouse outro aviso pola caída dun raio, esta vez nun cadro de electricidade que ardeu sen causar danos maiores.
VOOS CANCELADOS
O vento deixa algúns voos cancelados como no aeroporto de Santiago, do avión que tiña que despegar ás 10.30 horas con destino Madrid. No aeroporto de Vigo, dous voos procedentes ou destino Madrid foron cancelados na mañá deste domingo, do mesmo xeito que sucedeu no aeroporto da Coruña.
ALERTAS ACTIVAS
Para esta xornada, a Axencia Estatal de Meteoroloxía (Aemet) informa dunha mellora da situación no litoral, polo que se dá por finalizado o episodio meteorolóxico adverso costeiro de nivel vermello vixente ata o momento. Ante isto, permanece activa unha alerta laranxa en toda a costa galega que poderá deixar ondas de ata oito metros e ventos de forza sete. Tamén hai alerta amarela por choiva nas provincias da Coruña e de Pontevedra.
