O consumo da pataca en Galicia, unha aposta pola calidade

'Pataca de Galicia. En boca de todxs' é o lema da campaña co que a Consellería de Medio Rural promoverá o consumo de pataca con selo diferenciado da Indicación Xeográfica Protexida (IXP). A campaña comezará este domingo 19 e estenderase ata o 31 de decembro. O conselleiro do Medio Rural, José González, presentou esta iniciativa en Ourense, sobre a que resaltou a "importancia da pataca na gastronomía galega, que acompaña a gran parte dos pratos típicos que fan que Galicia sexa reconocible fóra das nosas fronteiras". Seguindo esta liña, asegurou que "a gastronomía galega non se entende sen este produto".

Para a campaña destinaranse 300.000 euros co obxectivo de que estea presente en medios de comunicación locais, provinciais, autonómicos e estatais a través de creatividades, cuñas radiofónicas ou anuncios audiovisuais. Ademais, o conselleiro expuxo que non só quere chegar ao maior número de consumidores e consumidoras, senón tamén "facer memorable o produto e que cando fagan a compra inclúan pataca galega nas súas bolsas".

Segundo o conselleiro, esta promoción está dentro da estratexia da Xunta para potenciar a súa viabilidade como actividade económica. Tamén a cualificou como un "merecido recoñecemento" aos 90 produtores (con presenza na propia campaña) e 12 almacenistas amparados pola IXP. Así mesmo, fixo referencia á futura Lei de calidade alimentaria e ao Plan de promoción de produtos agroalimentarios galegos (cunha previsión de seis millóns de euros) que de aprobarse no Parlamento autonómico suporían un "reforzo" na promoción da pataca.