Cae un clan de chatarreiros por roubos no punto limpo da Estrada
Hai seis detidos, un deles menor. Contaban coa colaboración dun traballador municipal para subtraer a chatarra.
Por Europa Press / Redacción | Compostela | 27/11/2023 | Actualizada ás 10:44
A Garda Civil detivo a seis persoas, unha delas menor de idade, e investigado a outras dúas en relación a dous roubos ocorridos no punto limpo do polígono de Sergude, no municipio coruñés de Boqueixón. Subtraían, principalmente, electrodomésticos e material tecnolóxico que logo vendían nunha chatarrería no Porriño.
Trátase da Operación Lubu, que levou a cabo polo Equipo Roca da Garda Civil de Santiago de Compostela desde o mes de outubro, tras detectarse un aumento significativo do número de roubos neste recinto, o cal xerou "alarma social" na empresa xestora e nas do polígono.
Así, o Instituto Armado logrou identificar en relación a estes feitos a sete persoas, veciñas da Estrada aínda que de orixe estranxeira e con lazos familiares entre si. Todos eles actuaban de forma coordinada e desprazábanse en tres furgonetas desde a súa localidade de procedencia e ata Boqueixón.
Tal e como explica a Garda Civil, o 'modus operandi' desta banda consistía en realizar os asaltos os días de apertura do ecoparque, é dicir, os mércores e os sábados. Estacionaban as furgonetas na parte traseira do lugar cando ía ser a hora do peche e, mentres uns vixiaban desde fóra, o resto accedía ao interior rompendo a malla ou saltando o perímetro. Unha vez dentro, priorizaban facerse con material tecnolóxico e electrodomésticos.
Ademais, a Garda Civil descubriu, durante a investigación, que nalgunhas ocasións esta banda contaba coa colaboración dun empregado municipal do punto limpo, quen supostamente recibía subornos a cambio de facilitarlles a entrada.
Tras os roubos, transportaban o subtraído a unha chatarrería no Porriño para a súa venda. Os investigadores estimaron que durante outubro e novembro, os delincuentes obtiveron beneficios superiores aos 16.000 euros.
Na fase de explotación da operación, cinco membros da banda foron detidos in fraganti mentres realizaban un novo roubo con escalo e incautáronselles electrodomésticos, residuos e pezas metálicas. Os demais foron apresados posteriormente.
