A concelleira Carme da Silva despídese de Pontevedra e dá o salto a Madrid como senadora do BNG
A edila pontevedresa de Urbanismo, Carme da Silva, anunciou este martes que deixa a súa acta na Corporación municipal para centrarse na súa ocupación como senadora do BNG e dedicarse "ao 100 % a que Pontevedra e Galicia teña capacidade de influencia no Estado".
Por Europa Press / Redacción | PONTEVEDRA | 28/11/2023 | Actualizada ás 16:26
A edila pontevedresa de Urbanismo, Carme da Silva, anunciou este martes que deixa a súa acta na Corporación municipal para centrarse na súa ocupación como senadora do BNG e dedicarse "ao 100 % a que Pontevedra e Galicia teña capacidade de influencia no Estado". Carme da Silva compareceu este martes ante os medios de comunicación acompañada do alcalde de Pontevedra, Miguel Anxo Fernández Lores, que valorou a decisión como unha "gran noticia" porque "Pontevedra gaña unha concelleira que estará destinada en Madrid".
"É unha honra poder ser representante de Galicia nas Cortes e concelleira de Pontevedra nas Cortes do Estado", respondeu Carme da Silva, garantindo que o seu traballo pola 'Boa Vila' continúa adiante "pois hai moitas cuestións que se seguirán impulsando, e que xa se están impulsando neste momento".
O alcalde destacou os logros das xestións que Carme da Silva está a realizar en beneficio de Pontevedra como o desbloqueo do viario de Mollavao e o acordo coa Dirección Xeral de Tráfico (DXT) para abandonar os terreos que ocupan as súas instalacións na Xunqueira de Alba.
"Coñezo desde hai moito tempo a súa capacidade de traballo, a súa capacidade de política e de xestión, é unha alegría que podamos ter en Madrid unha persoa que demostrou esa capacidade, que participou nas negociacións que se fixeron en Madrid para o Goberno actual, e que neste pouco tempo xa ten feito cousas importantes para Pontevedra", destacou Lores.
"SEMPRE SEREI CONCELLEIRA DE PONTEVEDRA"
Neste sentido, Carme da Silva apuntou que "a experiencia destes meses, antes de que empezase a investidura, demostrou que máis aló da presenza, da actividade ordinaria do Senado, é moi importante estar alí para xestionar e mover as cousas". Ademais, comentou que nesta lexislatura "o acordo e a negociación vai ser moi importante". Emocionada, Da Silva recoñeceu: "sempre serei concelleira de Pontevedra", cargo que ocupou desde 1995 cando tomou posesión por primeira vez na oposición.
