Interior Galego Vivo reitera a súa proposta a BNG, PSdeG e Sumar para un acordo amplo en Lugo e Ourense

Interior Galego Vivo reiterou ao BNG, ao PSdeG e a Sumar a súa proposta de acordo amplo na provincia de Lugo e Ourense para "terminar coa hexemonía do PP" e "pór a voz do interior galego no Parlamento".

A formación na que participa a que foi deputada de En Marea Paula Verao dirixiuse a BNG, PSdeG e Sumar Galicia para propor un encontro sobre as eleccións galegas e un programa centrado nas necesidades do rural.

Así o manifestou nun comunicado remitido aos medios este mércores, no que lembra que o pasado día 18 de novembro celebrou a súa V Asemblea, na que acordou traballar para articular este acordo amplo sobre un programa común de defensa do rural e dos servizos públicos en todo o territorio, que garanta que ningún voto se perde en Lugo e Ourense para conseguir o cambio político en Galicia.

Tras lembrar que enviou invitacións a estas formacións para fixar data para o encontro, indicou que "non é tarde para maximizar a onda de cambio que existe en Galicia para terminar cun goberno do PP que antepón os intereses de grandes fortunas e grandes empresas por encima da cidadanía" e que "condena ao interior galego á inanición" á vez que destrúe a sanidade e os servizos públicos.

A formación sinala que o axustado resultado das diferentes eleccións, que "penaliza" a fragmentación, e o carácter "crítico do momento actual", esixe "audacia e diálogo permanente" con outras opcións que permitan articular acordos amplos para avanzar en dereitos e mellorar a calidade de vida de xente.

"Non é tempo de enrocamientos identitarios, senón de solucións valentes: cada forza política que quere o cambio galego ten que facer o máximo esforzo por ampliar o seu electorado, derrubando o muro da alta abstención e aglutinando o máximo posible o seu espazo", sinala.

Asemblea de Interior Galego Vivo en defensa da Galicia rural e baleira | Fonte: remitida