Concentración de traballadores de Einsa Print en Santiago esixindo á empresa mellorar as condicións do ERE

Traballadores de Einsa Print, con planta de impresión nas Pontes, concentráronse este xoves en Santiago para facer presión e tratar de que a empresa mellore as condicións do expediente de regulación de emprego (ERE).

En declaracións aos medios de comunicación, o presidente do comité de empresa, Daniel Pena Valdivieso, concretou que o que reclaman é mellores condicións tanto para as saídas como para os traballadores que queden.

Este mércores tiveron a penúltima reunión do período de consultas do ERE e os traballadores presentaron unha contraoferta, á que a empresa respondeulles indicando que na cita deste xoves, no Consello Galego de Relacións Laborais, achegaría a súa "oferta final".

Antes da reunión, este xoves, o representante sindical lembrou que á administración pídenlle "desde o principio que axudase a facer unha prórroga", así como a procura de "unha alternativa industrial para a xente que se pode ir fóra".

Valdivieso tamén se referiu ao plan de formación comprometido e solicitou que vaia "dirixido a algún tipo de empresa que os poida recolocar".

Protesta de Einsa Print ante o Consello Galego de Relacións Laborais