A Xunta destina 1,8 millóns para o turismo naútico, de "poder adquisivo alto"

O Consello da Xunta autorizou hoxe a sinatura dun convenio de colaboración por 1,8 millóns de euros entre Turismo de Galicia e a Asociación de Clubes Náuticos de Galicia (Asnauga) para o impulso do turismo náutico a través da realización de distintas actividades e a revalorización do potencial turístico dos portos de Galicia. 

En virtude deste convenio, segundo suliñou Alfonso Rueda, revalorizaranse os activos turísticos vinculados ao turismo náutico, con accións de mellora da eficiencia das infraestruturas portuarias galegas, a mellora dos servizos, a rehabilitación de infraestruturas e a dixitalización de recursos para optimizar a experiencia do visitante náutico en Galicia, entre outras accións. 

"Preténdese así unha maior integración e cohesión, se estas infraestruturas teñen os servizos e a calidade necesarios para desenvolver a oferta turística náutica dos destinos costeiros galegos a través da creación de servizos costeiros nas rías, a creación e promoción de proxectos de emprendementos innovadores, o desenvolvemento de actividades e deportes náuticos, entre outras", destacou Rueda. "Trátase de seguir potenciando este turismo interesante dun poder aquisitivo alto", engadiu.

A Xunta, tomando como referencia os casos de éxito en Francia, Alemaña ou Portugal no ámbito do turismo fluvial, quere conseguir que os portos volvan ser a porta principal de entrada para a visita turística ao territorio e aos municipios, co propósito de que se vexa no turismo náutico un potencial para ofrecer mobilidade e servizos de acollida desde o litoral.