O CHUS realiza a primeira intervención en España para quitar cálculos renais a unha moza de 21 anos embarazada
"A necesidade de realizar unha nefrolitotomía percutánea é excepcional e unicamente reservaríase para aqueles casos de gran cantidade de volume de cálculo e complexidade, como era o caso desta paciente", sinalaron fontes do servizo do CHUS.
Por Europa Press / Redacción | SANTIAGO DE COMPOSTELA | 04/01/2024 | Actualizada ás 12:34
O Complexo Hospitalario Universitario de Santiago levou a cabo a primeira intervención feita en España para quitar cálculos renais a unha muller embarazada, un problema que habitualmente se manexa de maneira conservadora con drenaxe ata o parto. A operación de nefrolitotomía percutánea levouse a cabo por parte de profesionais da Unidade de Endouroloxía e Litiasis do Servizo de Uroloxía da área sanitaria de Santiago de Compostela e Barbanza, segundo informou a Consellería de Sanidade este xoves.
A intervención levouse a cabo a finais do pasado ano no Hospital de Conxo e a enferma, de 21 anos e 28 semanas de xestación, foi dada de alta en 48 horas. Trátase da primeira operación deste tipo realizada en España a unha embarazada, xa que de forma habitual trátase a litiasis de forma conservadora e, cando non é posible, abórdase cunha intervención cirúrxica sen orificio no ril da paciente.
"A necesidade de realizar unha nefrolitotomía percutánea é excepcional e unicamente reservaríase para aqueles casos de gran cantidade de volume de cálculo e complexidade, como era o caso desta paciente", sinalaron fontes do servizo do CHUS. O equipo destaca a complexidade da intervención como evidencia que existan unicamente a nivel mundial sete artigos publicados que recollen a experiencia total de 16 pacientes xestantes intervidas mediante nefrolitotomía percutánea.
