18F.- O programa electoral do PPdeG inclúe apoio ao deporte e á cooperación en materia de igualdade e medio ambiente
Por Europa Press / Redacción | SANTIAGO DE COMPOSTELA | 05/01/2024 | Actualizada ás 17:32
O equipo redactor do programa electoral do PPdeG, coordinado por Valentín García, mantivo reunións esta semana con diferentes colectivos sociais relacionados co ámbito deportivo e da cooperación, co obxectivo de solicitar propostas e medidas e acordar aspectos para incluír no documento no que traballan de face ás próximas eleccións autonómicas do 18 de febreiro.
Tal e como destacaron os populares, nestas reunións fíxose referencia "ao papel relevante" que aseguran terá o deporte no programa que preparan, "non só cunha aposta especial cara ao deporte base, federado ou escolar, senón tamén para fomentar a práctica deportiva habitual en todos os tramos de idade". Ademais, os populares galegos mostraron o seu compromiso para que Galicia "conte cada vez cun maior número de deportistas de alto nivel e reforce o seu posicionamento como lugar de orixe destes deportistas".
Así mesmo, destacaron que o equipo redactor comprometeuse a "optimizar e reforzar" os investimentos en infraestruturas deportivas, así como un plan que "estruture o ámbito laboral e formativo dos adestradores" e "articular a maneira para que poidan porse a disposición da cidadanía as instalacións que dependan dos centros educativos, fóra do horario lectivo".
COOPERACIÓN
Sobre a cooperación galega, o PPdeG reuniuse coa Coordinadora Galega de ONG para o Desenvolvemento, coa que se comprometeu a continuar co Plan director de cooperación galega da Xunta. Tamén acordaron "seguir traballando en medidas contra a desigualdade de xénero ou as novas necesidades creadas polo impacto climático, a xestión da auga e a cooperación pesqueira". Ademais destas reunións, o partido que lidera Alfonso Rueda fai un chamamento aos galegos a participar no seu programa electoral e a facer achegas, suxestións ou manifestar as súas inquietudes na páxina web rueda.gal.
