Beiras reaparece para intervir nunha sentida homenaxe a súa compañeira vital, a artista Aurichu Pereira

O Museo do Pobo Galego acolle este xoves unha homenaxe á artista Aurora Pereira Carballo (1940-2023), coñecida como Aurichu Pereira, e que destacou nas facetas de pintora, música e deseñadora de moda, así como polo seu compromiso co nacionalismo galego.

Segundo informou esta entidade, será un acto de recordo da artista no que haberá poesía, música e numerosas intervencións de persoas que a trataron, amizades e familiares, incluído a súa parella vital, o histórico nacionalista Xosé Manuel Beiras

A homenaxe comezará coa intervención de Concha Losada, presidenta do Padroado do Museo do Pobo Galego, e continuará coa proxección dun vídeo e a presentación de Xosé Ramón Fandiño, escritor e membro do padroado, así como amigo persoal de Aurichu.

Seguidamente, intervirán a filóloga Chus Nogueira e a historiadora de arte Mercedes Rozas, e seguirá coa actuación musical de Miro Casabella. En representación do ámbito poético tomarán a palabra Oriana Méndez e Celso F. Sanmartín. A música continuará coa guitarra de Tomás Camacho, que dará paso á intervención do político, economista e intelectual Xosé Manuel Beiras, parella de Aurichu Pereira. O acto pecharase cunha actuación do acordeonista Tomé Mouriño.

A homenaxe será aberta a todas as persoas que queiran asistir e retransmitirase en directo a través da canle de Youtube do Museo do Pobo Galego.

EXPOSICIÓN

Ademais do acto, o museo acollerá unha exposición sobre a artista, que poderá visitarse ata o 11 de febreiro e que está composta por unha mostra da obra pictórica da artista, con cadros da súa primeira etapa, máis figurativos, e da última, de manchas de cores, así como tamén dunha pequena selección de deseños de roupa feitos por ela e algún documento histórico relacionado coa vida da artista.

Homenaxe a Aurora Pereira, coñecida como Aurichu', no Museo do Pobo Galego este xoves 11 de xaneiro.. MUSEO DO POBO GALEGO | Fonte: Europa Press