Unha exposición en San Martiño Pinario conmemorará os 55 anos de liturxia en lingua galega

O mosteiro de San Martiño Pinario en Santiago de Composptela, acollerá ata finais de febreiro a mostra '55 anos da liturxia en galego (1969-2024)', promovida pola Editorial SEPT e producida por Merlín Comunicación, con apoio da Consellería de Cultura, Educación, FP e Universidade, e o Arcebispado de Santiago.

Na inauguración, o secretario xeral de Política Lingüística, Valentín García, sinalou que a mostra recolle unha parte da "historia lingüística" de Galicia á que non se adoita prestar atención, a pesar de que ten "claras repercusións na actualidade".

"Se queremos que o galego se use en todos os ámbitos da vida, hai que ser conscientes dos avances e dos retos que se lle presentan tamén espazos como a liturxia ou, en xeral, a relixión, coa que mesmo as persoas non crentes teñen contacto en enterros, festas patronais, etc.", sinalou o secretario xeral

A exposición, que pode visitarse ata o 29 de febreiro, está composta por seis paneis e recolle o percorrido realizado pola lingua galega en liturxia ao longo de 55 anos, desde a aprobación, en 1963, do uso das linguas vernáculas na liturxia, aprobado polo Concilio Vaticano II, ata a aprobación, en 1968, do galego como lingua litúrxica nas dioceses de Galicia.

A noticia de que se usaría o galego na liturxia deuse a coñecer o 7 de xaneiro de 1969, con gran repercusión social. Así mesmo, faise referencia ás primeiras traducións ao galego de textos como o Misal Romano ou a Biblia, que a Xunta volve editar a día de hoxe en colaboración con SEPT.

Mosteiro de San Martiño Pinario