18F.- O PPdeG presenta o seu "contrato con Galicia" con 870 medidas e co compromiso de duplicar a vivenda pública

O presidente do PPdeG, Alfonso Rueda, presentou o seu programa electoral, que está composto por 870 medidas entre as que remarcou o seu compromiso de duplicar o parque público de vivendas e que en Galicia, en 2028 cando finalicen o catro anos de lexislatura, haxa como mínimo 8.000 vivendas destas características.

Así o fixo este sábado en Lugo na presentación do seu primeiro programa electoral co que concorren aos comicios autonómicos do 18 de febreiro e que definiu como o "contrato con Galicia".

Desta forma, Rueda lembrou que, actualmente, na comunidade hai 3.800 vivendas públicas e, ademais, incidiu en que apoiarán o sector privado, que "non é ningún demo", polo que porán as medidas para que, cando acabe a lexislatura, haxa 20.000 vivendas protexidas. "Moitas delas dedicadas ao aluguer con prezos sociais", apostilou.

Ademais, Rueda reivindicou o seu programa "para unha Galicia que prospera". As enerxías verdes "son tan fundamentais", polo que quere que "unha industria como Altri instálese en Galicia".

O programa, segundo detallou o coordinador do mesmo, Valentín García, componse de 870 medidas que se dividen en cinco eixos fundamentais. Así, o documento, composto por 177 páxinas, "será accesible a todas as persoas", estará en varios idiomas, ten pictogramas e poderá consultarse en liña.

DUPLICAR As VIVENDAS PÚBLICAS

Neste apartado, ao que tivo acceso Europa Press, establecéronse 14 eixos vertebrais. O primeiro deles recolle a convocatoria de axudas a particulares para a construción de vivendas unifamiliares novas.

Como segundo punto estableceron "o impulso" de axudas ao aluguer para mozos menores de 36 anos, co obxectivo de "axudarlles a acceder á súa primeira vivenda" e co foco posto nas familias monoparentais.

Os populares comprometéronse a renovar o pacto social pola vivenda a través da participación e achegas de "todos os axentes do sector" no período 2026-2030. En canto á vivenda protexida, crearán unha plataforma residencial cos concellos e axudarán aos concellos na creación dos seus parques públicos de vivenda.

Tamén apostarán polo uso de madeira certificada na rehabilitación de vivendas e nos centros históricos rehabilitarán 300 inmobles abandonados polo que, segundo as previsións do PPdeG, en 2028 Galicia contará con 14 áreas Rexurbe.

Por outra banda, "facilitarán" a rehabilitación e mellora de 25.000 vivendas enerxeticamente eficientes e accesibles con axudas a propietarios e comunidades de propietarios. "Apostaremos polo aluguer seguro", estableceron, co apoio a que se renten vivendas a "un prezo adecuado". Neste apartado, lanzarán axudas de ata 16.000 euros para financiar obras para adecuación das vivendas.

Crearán unha oficina de asesoramento á antiocupación xa que, segundo recolleu o PPdeG, "unha das principais de preocupacións dos galegos" que teñen unha propiedade é a "ocupación ilegal" de vivendas.

O rural é outro dos eixos recolleitos neste punto no que implantarán un novo programa, 'Revive no rural' para atraer á poboación aos concellos rurais que teñan un crecemento demográfico negativo. Finalmente, neste apartado engadiron un reforzo ás medidas para fomentar a vivenda colaborativa que se priorizará o seu inicio nas cidades e contornas periurbanos.

ALTRI E ALCOA

Na súa intervención, Alfonso Rueda tamén fixo referencia a Altri que quere que "se instale en Galicia" e volveu a insistir en que a fábrica de Alcoa ten que quedar na Mariña lucense. Foi entón, cando fixo referencia á cita que o presidente do Goberno, Pedro Sánchez, tivo nesta xornada en Lugo para arroupar ao candidato do PSdeG á presidencia da Xunta, José Ramón Gómez Besteiro.

"NON TEÑO QUE CHAMAR AO PAÍS VASCO NIN A CATALUÑA"

O presidente do PPdeG, Alfonso Rueda, reivindicou que, de gañar as próximas eleccións autónomicas, "non terá que chamar" ao "País Vasco nin a Cataluña" para aplicar o seu programa electoral.

"Non vou ter que chamar a Moncloa, non vou ter que ter escuras negociacións entre os que perden as eleccións e non vou ter que chamar nin ao País Vasco nin a Cataluña", esgrimiu co programa electoral en man e ante un auditorio con 1.000 persoas que acudiron ao acto de presentación este sábado en Lugo.

Rueda defendeu o seu programa "realizable", no que "non hai nada" que "non se poida pagar" cos orzamentos autonómicos, sen "promesas imposibles". "Para prometer a lúa xa están outros que nunca gobernaron", remarcou.

A continuación, afeou a visita do presidente do Goberno, Pedro Sánchez, que este sábado estivo tamén en Lugo nun acto dos socialistas, a Navantia esta semana para facer o anuncio dunha nova fragata para a mariña española. "Sorprendeu a todo o mundo, incluída á mariña española, que non sabía absolutamente nada", incidiu.

O presidente do PPdeG tirou de retranca para comentar que este sábado tamén esperaba algún anuncio por parte de Sánchez, como a fábrica que quere construír Altri en Lugo pero, con todo, "non houbo nin gol no estadio Anxo Carro", instalacións deportivas que se atopan nas proximidades do Pazo de Feiras e Congresos onde os populares celebraron o seu acto. "Polo menos hai que agradecer que se non ten intención de comprometerse, polo menos que non amenta por unha segunda vez. Iso polo menos hai que agradecelo", ironizou Rueda.