Os bombeiros comarcais rexeitan a última proposta das administracións e haberá nova negociación o xoves

Os bombeiros comarcais, reunidos en asemblea este luns, rexeitaron a última proposta das administracións para desbloquear o conflito e desconvocar a folga indefinida. Diso informa o comité de folga este luns nun comunicado. Agora, os representantes dos bombeiros están convocados a unha nova reunión con membros de Xunta e deputacións este xoves, 1 de febreiro, "para ver a posibilidade de asinar un acordo que satisfaga ás partes".

Non entanto, o comité de folga valora que a parte social apoia o seu traballo e encomenda a este órgano a resolución da problemática na que se atopan estes profesionais. Os bombeiros comarcais levan en folga indefinida desde o 15 de xuño de 2023. Aumento salarial, melloras laborais e incremento de efectivos son algunhas das demandas que reclaman estes profesionais.

Deceas de bombeiros dos parques comarcais de Galicia durante a protesta por unha mellora das condicións laborais, fronte á Deputación de Lugo, a 31 de outubro de 2023, en Lugo | Fonte: Carlos Castro - Arquivo