Consulta se es un dos 1.200 afortunados de entre 155.000 que entrou nas listas da Xunta de contratos temporais

Case 1.200 profesionais incorporáronse ás listas de contratación temporal da Xunta de Galicia durante 2023 para cubrir vacantes, facer substitucións e reforzar os servizos públcios que presta a administración.

O Diario Oficial de Galicia (DOG) publica este martes as listas definitivas de admitidos e excluídos para diversas categorías da administración xeral ás que se incorporan un total de 1.156 profesionais.

Entre as listas publicadas figuran as de enxeñeiros de camiños, canles e portos, de minas e de montes, veterinarios, profesores numerarios de institutos politécnicos marítimo-pesqueiros, escala de axentes do Servizo de Gardacostas de Galicia, fisioterapeuta, terapeuta ocupacional ou xefe/a de cociña.

A eles súmanse os 239 profesionais que xa se incorporaron ás listas de contratación temporal para diferentes categorías sanitarias, publicadas de forma separada hai unhas semanas. En total, o número de solicitudes nas listas de contratación da Xunta de Galicia é de 155.351.

As listas definitivas poderán consultarse no portal web corporativo da Xunta de Galicia, http://funcionpublica.xunta.gal e eb o Servizo de Atención e Información á Cidadanía a través do teléfono 012. As persoas interesadas que así o desexen disporán do prazo dun mes desde a publicación das listas no DOG para presentar recurso de alzada.

Miles de aspirantes realizan as oposicións en Silleda | Fonte: Álvaro Ballesteros - Arquivo