Sanidade ultima a guía de acompañamento da muller e contacto 'pel con pel' nas cesáreas
O documento expón o dereito da muller a estar acompañada pola persoa que decida.
Por E.P. | SANTIAGO DE COMPOSTELA | 02/02/2024 | Actualizada ás 12:35
O conselleiro de Sanidade, Julio García Comesaña, presidiu este venres a segunda reunión do grupo de traballo para a redacción da guía de acompañamento da muller e contacto 'pel con pel' dos partos por cesárea, coa que se unificarán os protocolos de atención ás mulleres nestes casos.
No encontro deste venres, no que participou persoal da Dirección Xeral de Asistencia Sanitaria do Sergas, e unha vintena de profesionais de diferentes áreas implicadas no proceso do parto por cesárea (obstetricia, anestesioloxía, pediatría-neonatoloxía, enfermaría, matronas, etc.), revisouse o documento do borrador e se abordaron as suxestións e achegas destes profesionais. Tras a reunión, o grupo de traballo pechará o texto, que será revisado polo Sergas antes de remitilo ás sociedades científicas e asociacións para recibir as súas achegas e poder ter aprobada a guía no primeiro trimestre do ano.
O obxectivo principal desta guía é homoxeneizar os protocolos de acompañamento da muller polas persoas que ela decida, durante o nacemento por cesárea, o contacto 'pel con pel' precoz e ininterrompido entre nai e fillo, tanto en quirófano como durante a recuperación posterior.
Así mesmo, o documento expón unha serie de obxectivos específicos, como o respecto ao dereito da muller de estar acompañada pola persoa que decida ou garantir ese contacto 'pel con pel' para evitar "separacións innecesarias" entre a nai e o seu bebé. Para iso, recóllense recomendacións e actividades para levar a cabo nos hospitais da rede sanitaria pública co fin de elaborar os seus correspondentes protocolos, adaptados ás características de cada centro, e cos fundamentos científicos nos que se basean as recomendacións. Por último, a guía recolle indicadores para avaliar a posta en marcha dos protocolos e as etapas desa implementación.
A elaboración da guía parte dunha proposición non de lei aprobada no Parlamento de Galicia en outubro pasado, coa que se instaba á Xunta a homoxeneizar o protocolo de atención en cesáreas en todas as áreas sanitarias, para permitir o acompañamento e a humanización dos partos e nacementos.
