Por E.P. | OURENSE | 04/02/2024 | Actualizada ás 21:21
Sumar Galicia denunciou ao PP de Ourense ante a Xunta Electoral polo "uso indebido" da imaxe corporativa da Xunta na repartición de propaganda e papeletas que fixo a deputada de Bande, Ana Belén Vázquez Blanco, nunha 'porta a porta' o pasado venres, primeiro día da campaña do 18 de febreiro.
Na denuncia, Sumar recolle a publicación realizada pola propia deputada na súa rede social X na que se ve á política popular repartindo propaganda electoral do PP e sobres de papeletas "pechados" vestindo unha cazadora co logotipo da Xunta de Galicia.
"Sumar entende que o uso da imaxe corporativa nestes actos de campaña supón unha vulneración do principio de neutralidade, transparencia e igualdade", sinala nun comunicado a formación laborista, quen considera que o partido de Alfonso Rueda fixo, deste xeito, unha "apropiación ilexítima da imaxe do goberno".
Á marxe diso, Sumar sostén que repartir propaganda desta maneira "supón un intento de confundir aos votantes", que "poden chegar a pensar que as papeletas e o resto de material propagandístico chega de forma oficial desde o propio o propio Goberno galego".
Ademais, sinala que publicar imaxes nunha rede social como X busca "ter un alcance maior do acto de campaña". Neste sentido, Sumar Galicia apunta que, no momento de interpor a denuncia ante a xunta electoral, a publicación da deputada alcanzaba as 317.000 visualizacións, polo que pide a eliminación deste post.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.