Sánchez envórcase no final da campaña e estará o xoves na Coruña e no peche en Santiago
Por E.P. | Santiago de Compostela | 12/02/2024 | Actualizada ás 12:19
O presidente do Goberno e secretario xeral do PSOE, Pedro Sánchez, vaise a envorcar no final da campaña electoral en Galicia na que os socialistas tratan de darlle a volta ás enquisas para sumar maioría cos nacionalistas do BNG e arrebatarlle a Xunta ao PP. Sánchez acudirá este xoves 15 de febreiro á Coruña e ao día seguinte participará no mitin de peche en Santiago de Compostela, segundo confirman fontes de Ferraz.
O líder dos socialistas quere estar presente no esprint final da campaña para arroupar ao candidato do PSdG á presidencia da Xunta, José Ramón Gómez Besteiro, ao que todas as enquisas sitúan en terceira posición, por detrás do PP e do BNG. Nestes últimos días antes da votación o 18 de febreiro, o PSdG aspira á "remontada" e a superar os prognósticos que dan mesmo menos dos 14 escanos que o PSOE tivo no Parlamento galego na última lexislatura.
Deste xeito Sánchez completará un mes de intensa presenza en Galicia, onde pasaría por todas as provincias unha vez acabe a campaña electoral. Os socialistas empezaron a precampaña coa Convención Política que reuniu á plana maior do partido na Coruña a finais de xaneiro.
Despois Sánchez acudiu a un mitin en Lugo e xa en plena campaña electoral participou en actos con militantes en Ourense, Vigo e finalmente farao na Coruña e Santiago. Ademais dos actos de partido, nas últimas semanas Sánchez acudiu en varias ocasións a Galicia en actos institucionais en calidade de presidente do Goberno.
