Galicia segue sendo Popular con Fraga, con Feijóo e agora con Rueda
Os populares consiguen a súa quinta maioría absoluta consecutiva en Galicia, tras catro de Feijóo, un goberno bipartito e outras catro maiorías absolutas antes de Fraga. O BNG consegue un forte ascenso ata os 25 deputados, á conta dun PSdeG que se afunde ás 9 prazas, nun Parlamento no que entra DO.
Por Europa Press / Redacción | Santiago de Compostela | 18/02/2024 | Actualizada ás 23:31
O PP afianza o seu feudo en Galicia e poderá gobernar outros catro anos, ao conseguir a súa quinta maioría absoluta consecutiva, cun desgaste menor de só dous deputados respecto dos últimos resultados que lograra Alberto Núñez Feijóo antes de deixar, hai dous anos, a Alfonso Rueda como sucesor. Está claro que Galicia é Popular. Desde a chegada de Manuel Fraga, en 1989, todos os gobernos, a excepción do bipartito do PSdeG-BNG de 2005 a 2009, foron do Partido Popular.
Rueda, que foi o secretario xeral do PP os case catro anos que os populares estiveron na oposición e man dereita de Feijóo en todos os seus gobernos ata converterse no seu substituto, logrou 40 escanos nas eleccións autonómicas deste domingo. De 42 anos de autonomía, os populares gobernaron en 36 e poderán chegar aos 40 anos se completan a próxima lexislatura e non hai adianto electoral.
O BNG de Ana Pontón logra un ascenso de seis escanos, ata os 25, á conta dun PSdeG-PSOE que cultiva os seus peores resultados históricos, ao caer a nove prazas nun Parlamento galego no que debutará Democracia Ourensana, o partido do alcalde de Ourense, Gonzalo Pérez Jácome. Nin Vox nin Sumar logran representación.
Á espera do escrutinio, o vindeiro luns 26 de febreiro, dos sobres dos 29.300 galegos residentes no estranxeiro que participaron nestas eleccións (un 6,15 % do Censo Electoral dos Residentes Ausentes), o PP consegue unha vitoria incontestable en Galicia, que tamén axuda a consolidar o liderado de Feijóo.
Tras adiantar cinco meses as eleccións en Galicia, facéndoas coincidir co debate da Lei de Amnistía, e despois dunha campaña cunha intensa implicación de Feijóo (fixo campaña 13 dos 15 días durante os cales se pode pedir o voto), os populares concentran o 47,35 % dos apoios.
ASCENSO DO BNG
Os nacionalistas partían xa dun dos mellores resultados da súa historia: os 19 escanos que obtiveran en 2020, pero nas eleccións deste domingo rompen o seu teito tamén en votos, ao conseguir meter nas urnas 466.752 votos.
Ana Pontón, deputada desde 2004, pasou de tomar as rendas en 2016 dunha organización rota tras a escisión de 2012, a triplicar o número de escanos e volver ser a segunda forza política no Parlamento galego nos comicios de 2020. Nas deste domingo, os nacionalistas consolídanse como a primeira forza da oposición ao lograr seis deputados máis: dous pola Coruña, outros tantos por Pontevedra, e senllos por Lugo e por Ourense.
AFUNDIMENTO SOCIALISTA
Por contra, as esperanzas de Ferraz de que José Ramón Gómez Besteiro fose o candidato co que se retomase a tendencia á alza interrompida nas eleccións de 2012, cando o PSdeG empezou a caer en número de deputados, ata converterse en 2016 en terceira forza no Parlamento galego, topáronse este domingo coa realidade de cultivar os seus peores resultados históricos.
A implicación de Pedro Sánchez na campaña en Galicia, onde o último mes estivo en oito ocasiones, así como a do PSOE, con xornadas de ata cinco ministros e a participación do expresidente José Luís Rodríguez Zapatero en media ducia de mitins, non lograron frear o retroceso de máis de cinco puntos na porcentaxe de apoios.
Os socialistas perden case 50.000 votos e cinco escanos menos: dous menos por Pontevedra e outros tantos menos por Ourense e un menos pola Coruña. Unicamente estabilízanse con dous escanos en Lugo, a provincia de Besteiro, que apenas tivo uns meses para rodarse como candidato, despois de que 2016 tivo que renunciar a enfrontarse a Feijóo pola presidencia da Xunta e acabou dimitindo por imputacións de corrupción das que foi eximido.
DEMOCRACIA OURENSANA
Democracia Ourensana presentouse ás autonómicas en 2005, 2009, 2012 e 2016 sen lograr entrar no Parlamento de Galicia, pero crecendo en número de votos. Despois de que nas autonómicas de 2020 o PP chegara a un acordo con DO para que non concorrese ás eleccións, nas deste domingo o partido do alcalde de Ourense colleitou 15.312 votos e debutará no Pazo do Hórreo.
FRACASO DE SUMAR, DE PODEMOS E DE VOX
A pesar de lograr 6.000 votos máis respecto das pasadas autonómicas e conseguir 32.479 apoios, Vox queda lonxe da barreira do 5 % para entrar no Parlamento galego. Galicia seguesendo a única autonomía libre da ultradereita (só ten unha concelleira en Avión, un pobo de Ourense de 1.800 habitantes).
Os 28.154 votos de Sumar non se rendibilizan tampouco en escanos, co que non logra base territorial na Galicai do seu líder e vicepresidenta segunda do Goberno, Yolanda Díaz, na súa primeira incursión nuns comicios autonómicos. A entrada no Parlamento galego era importante para Sumar, que se atopa en proceso para articular unha fronte ampla de partidos a nivel estatal coa súa asemblea fundacional prevista para o 23 de marzo.
Tampouco logran rendibilizarse os 3.852 votos de Podemos, que decidiu concorrer á marxe de Sumar nestas eleccións e queda por detrás de opcións como PACMA.
