Pontón, cunha alegría contida, asegura que hai un "caudal de esperanza": "Hoxe non acaba nada"

A candidata do BNG á Presidenta da Xunta, Ana Pontón, afirmou que "os grandes cambios non son fáciles" pero afirmou que hai "un caudal de esperanza" e apelou ás persoas que están "decepcionadas" compartindo este sentimento pero cunha proclamación: "Hoxe non acaba nada". 

Ana Pontón chega ao cuartel xeral do BNG para reunirse coa executiva e seguir o escrutinio | Fonte: CÉSAR ARXINA

Na súa comparecencia ante os medios, Pontón insistiu en que "un país non se transforma dun día para outro" e afirmou que "esta campaña cambiouno todo" e que "a alternativa para construír un goberno ao servizo da cidadanía" é o BNG e comprometeuse a seguir traballando neste sentido.

"Imos conseguilo no futuro", mostrouse segura nunha comparecencia na que tivo palabras de agradecemento para o seu pai e para a súa nai Aurita. Pontón analizou que a cidadanía decidiu que "non houbese cambio político" e evitou entrar a valorar os resultados doutras organizacións políticas.

Pontón asegurou que o BNG seguirá traballando para "ensanchar" as súas bases e incidiu en que estas eleccións "o cambiaron todo". "Temos que ver como somos capaces de seguir ensanchando as bases do BNG e o que demostramos é que o BNG non ten teito e esa liña de seguir ensanchando vai ser clave. Aquí está o partido que pode darlle unha alternativa a este país e eu síntome con máis forza, con máis enerxía e con máis ganas que nunca", salientou.