Detidas tres persoas en Caldas de Reis cando transportaban un quilo de haxix nun vehículo
Por E.P. | SANTIAGO DE COMPOSTELA | 19/02/2024 | Actualizada ás 11:35
A Garda Civil detivo a tres persoas a pasada madrugada, tras ser sorprendidas nun control en Caldas de Reis transportando un quilo de haxix nun vehículo.
Segundo informaron fontes da Comandancia, o tres supostos delincuentes foron interceptados nun control nunha peaxe da autoestrada AP-9. Nese control, os axentes inspeccionaron o habitáculo do vehículo e atoparon, baixo o asento do condutor, unha bolsa de plástico en cuxo interior había un paquete envolto en cinta de embalar, e que contiña un quilo de haxix.
Dentro do paquete había 10 placas desta sustancia, cunha etiqueta e unha foto dunha planta de cannabis. Ao detectar o nerviosismo dos ocupantes do coche, os axentes pediron reforzo de varias patrullas, e procedeuse á detención destas tres persoas.
Trátase de tres homes de 22, 39 e 42 anos de idade, veciños de Ourense, Santiago e A Coruña, investigados como supostos autores dun delito de tráfico de drogas. As dilixencias serán remitidas ao xulgado de Caldas de Reis, onde deberán comparecer os investigados cando sexan citados.
