Falece unha persoa tras saírse da vía o vehículo no que circulaba en Mesía

O condutor dunha furgoneta faleceu este sábado tras saírse da vía por unha estrada da parroquia de Cabrui, no municipio coruñés de Mesía. Ao parecer, o home sufriu unha indisposición ao volante. Segundo informou o 112 Galicia, tivo constancia do sinistro sobre as 9.45 horas da mañá, cando un particular chamou para avisar dunha furgoneta fóra da estrada que enlaza Curtis con Mesía, na parroquia de Cabrui.

Tal e como explicaba o alertante, o condutor estaba totalmente liberado dentro da furgoneta, pero non se movía. Ata o lugar, mobilizados polo centro do 112, acudiron membros do GES de Curtis, axentes da Garda Civil de Tráfico e profesionais do Servizo de Urxencias Sanitarias de Galicia-061.

Unha vez alí, o GES sacou ao condutor do interior do coche e prestáronlle os primeiros auxilios, pero sen éxito. De tal forma, os sanitarios do 061 só puideron confirmar a morte do home.