Borja San Ramón anuncia que non seguirá á fronte de Podemos Galicia e aposta por Isabel Faraldo
A formación avanza que, en próximas datas, asumirá unha reestruturación da súa Executiva de face "ao novo ciclo".
Por Europa Press / Redacción | SANTIAGO DE COMPOSTELA | 03/03/2024 | Actualizada ás 18:16
O coordinador de Podemos Galicia, Borja San Ramón, anunciou este domingo no Consello Cidadán Galego que non se presentará ao próximo congreso da formación e mostrou a súa aposta por Isabel Faraldo, candidata á presidencia da Xunta nos pasados comicios autonómicos do 18 de febreiro. Nunha nota de prensa, Podemos detallou que o actual líder da formación destacou que hai "unha aposta clara por darlle continuidade ao traballo político comezado por esta dirección na campaña electoral e desenvolver un proxecto do que Isabel Faraldo é a principal cara visible".
Nesta liña, puxo en valor o "magnífico papel que fixo Isabel no debate da CRTVG" e a necesidade de "visibilizar a súa figura para poder desenvolver e darlle estabilidade a un proxecto" que "devolva" a Podemos ás institucións galegas. Así, desde a formación morada quixeron recalcar tamén que é o momento de "dar estabilidade e reforzar a organización" de face a "poder abrir un ciclo político que permita que o partido traballe en liña co rumbo tomado".
"Nesta campaña a militancia activouse e sacou con pura forza e convicción nos nosos principios, o que foi capaz de xerar experiencia e despois equipos de traballo na primeira vez que nos presentamos en Galicia como marca Podemos e que permita construír cara ao futuro", afirmou. En próximas datas, Podemos Galicia avanza que asumirá unha reestruturación da súa Executiva de face "ao novo ciclo".
