Carlos Silla, condenado a 15 anos de cárcere polo alixo en Arousa de alo menos 3.200 quilos de coca do narcoveleiro Benirrás

A sección segunda da Audiencia de Pontevedra condenou a quince anos de cárcere a Carlos Silla polo alixo de tres toneladas de cocaína do narcoveleiro Benirrás, que chegou á ría de Arousa en tres planadoras en marzo do ano 2020, en pleno confinamento pola pandemia da Covid-19.

O tribunal provincial tamén impuxo a Carlos Silla o pago de dúas multas de 360.000 euros cada unha, como autor dun delito grave contra a saúde pública. Na sentenza, recollida por Europa Press, considérase probado que el estaba á fronte da organización de narcotraficantes. Carlos Silla atópase nunha prisión en Portugal cumprindo outra condena de catorce anos por outro transporte de droga de 5.200 quilos de coca.

Esta vez, a confesión de Antolín Fernández Pajuelo foi un elemento determinante nesta nova sentenza condenatoria. A admisión da súa participación nesta actividade delituosa supuxo para el unha condena de 6 anos e 3 meses de cárcere, ademais de dúas multas de 130 millóns de euros. Igualmente, os outros dous acusados que admitiron a súa autoría, César R.R. e José D.R.S., foron condenados a 6 anos e 3 meses para o primeiro e para o segundo 3 anos e 4 meses.

Para o resto de procesados (J.H.G.R., J.O.T.A., J.M.V. e J.F.A.E.), as penas impostas son para cada un deles de 10 anos e 6 meses de prisión e dúas multas de 300 millóns cada unha. Neste fallo xudicial considérase probado que Silla era o dono do Benirrás e tamén doutras embarcacións que empregaba para o narcotráfico.

O veleiro foi preparado no porto de Portonovo e Pajuelo encargouse do seu traslado a Huelva e tamén de patronealo ata un punto a cen millas da costa, fronte a Ribeira, no que entregou un cargamento de, "canto menos", 3.200 quilos de cocaína a tres lanchas rápidas, unha das cales estaba balizada polas forzas de seguridade por unha investigación anterior sobre a fabricación de lanchas para o narcotráfico.

A Garda Civil obtivo unha nova autorización do xulgado de Cambados para activar a dita baliza poucos días antes do desembarco, o que propiciou un amplo despregamento de Policía Nacional, Aduanas e Garda Civil que lograron deter a tres dos tripulantes desas narcolanchas e incautar gran parte da droga que ía ser desembarcada.

A sentenza tamén recolle como feito probado que os procesados desfixéronse do Benirrás afundíndoo preto da Guarda, fóronse nunha zodiac pequena, e levaron dous fardos grandes de cocaína, porque pensaban que igual non lles pagaban. Contra esta sentenza cabe interpor recurso ante a Sala do Penal do Tribunal Superior de Xustiza de Galicia (TSXG).

Policías abren fardos de drga dun buque que foi interceptado cando transportaba 4 toneladas de cocaína, en Vigo | Fonte: Marta Vázquez Rodríguez - Europa Press

Carlos Silla, xulgado por narcotráfico cun dos seus veleiros apresados | Fonte: Policía - Arquivo