Piden cinco anos de cárcere para dous acusados de propinar unha malleira ás portas dun pub de Porto do Son

A Audiencia Provincial da Coruña acollerá o vindeiro mércores, día 20, o xuízo contra dous acusados de propinar unha malleira a unha terceira persoa ás portas dun pub de Porto do Son. Os feitos remóntanse á madrugada do 10 de novembro de 2018, cando ambos os procesados iniciaron unha discusión cunha terceira persoa ás portas dun pub. Durante a mesma, iniciaron un forcejeo tanto coa vítima como cun amigo, aos que golpearon.

O Ministerio Público considera os feitos constitutivos dun delito de lesións con deformidade, dado que á vítima quedaron secuelas, polo que pide para cada un cinco anos de cárcere e unha indemnización de 13.000 euros para o prexudicado.

Tamén a Audiencia da Coruña, pero neste caso na súa sede en Santiago, xulgará o venres 22 a un acusado de propinar un cabezazo na cara a unha persoa na rúa San Paio de Antealtares, causándolle "feridas considerables". Os feitos tiveron lugar na madrugada do 23 de setembro de 2019. Neste caso, Fiscalía pide para o procesado cinco anos de prisión e unha indemnización de 4.000 euros para a vítima.

AGRESIÓN EN VILAGARCÍA

Finalmente, a Audiencia de Pontevedra acollerá o martes 19 a vista contra un acusado de propinar "múltiples puñadas, sobre todo na cabeza" a outra persoa en Vilagarcía de Arousa. Os feitos tiveron lugar en setembro de 2022.

Como consecuencia da agresión, a vítima sufriu prexuízos permanentes, como unha cicatriz na cara e a perda de dúas pezas dentais. O fiscal pide para o acusado cinco anos de prisión e unha indemnización de 6.039,79 euros para a vítima, así como que se faga cargo dos gastos do Sergas, 1.760,76 euros.

Audiencia Provincial de Pontevedra | Fonte: Confilegal - Arquivo