Profesores, familias e alumnos protestan fronte ao IES O Milladoiro, onde este curso 26 docentes pediron o traslado

Máis dun cento de persoas, entre profesores, familiares, alumnos e representantes sindicais, protestaron á primeira hora da mañá fronte ao IES O Milladoiro, en Ames, contra os "problemas de convivencia" que "impiden dar clase" en circunstancias normais no centro. É unha situación que, segundo fontes coñecedoras consultadas por Europa Press, achácase a "unha mínima porcentaxe do alumnado" pero que xera problemas na actividade do centro. Ante iso, a comunidade educativa mira cara á dirección e, sobre todo, cara á Xunta e o seu equipo de inspección para reclamar solucións de acordo coa normativa de convivencia.

A concentración deste luns, celebrada ás 8.30 horas, antes do inicio das clases, estivo convocada polos sindicatos CIG, CCOO, UGT e STEG. Nela participaron principalmente traballadores do IES, pero tamén nais, pais, alumnos e algún veciño. Na protesta, unha das profesoras leu un comunicado que reclama "unha solución para conseguir recuperar o normal desenvolvemento da actividade educativa" e "preservar o dereito do persoal docente e non docente a exercer o seu labor profesional en condicións dignas", así como "o dereito" dos alumnos a ter un ensino "inclusivo, libre e en paz".

O claustro, segundo fontes consultadas por Europa Press, xa presentara un escrito avalado por unha trintena de profesores (o instituto ten ao redor de medio cento) para reclamar medidas correctoras de condutas. Ademais, os docentes mostran a súa desconformidade coa xestión da situación por parte da dirección e diríxense á Xunta e á Inspección educativa para que escoiten ao persoal. A CIG-Ensino, principal sindicato da educación pública galega, emitiu un comunicado no que pide "unha reflexión" tanto á dirección como á xefatura territorial da Consellería de Educación pola situación deste instituto, que fai "que este mesmo curso ata 26 profesores pediron o traslado a outros centros".

En canto á ANPA, consultada por Europa Press, rexeitou facer declaracións públicas, pero si matizou que a protesta estaba convocada unicamente polos sindicatos. Así mesmo, a asociación de nais e pais confirma que este martes manterá unha reunión con inspección. A ANPA presentou xa en decembro varios escritos para solicitar á dirección do IES unha solución ante estes problemas, tal e como informa nun comunicado publicado hai semanas. As familias denuncian que hai "unha permisividade" que xera "unha sensación de impunidade" entre os alumnos.

Profesores, familias e alumnos protestan fronte ao IES O Milladoiro, en Ames, polos 'problemas de convivencia' | Fonte: SINDICATOS