O prezo das exportacións galegas baixou un 2,5% en xaneiro e o das importacións un 7,9%

O prezo das exportacións galegas baixou un 2,5% en xaneiro, en comparación co mesmo mes de 2023, mentres que o das importacións caeu un 7,9%, segundo se desprende do Índice de Valor Unitario para o Comercio Exterior publicado este luns polo Instituto Galego de Estatística (IGE), recollido por Europa Press.

En concreto, o prezo dos bens de consumo exportados polas empresas da Comunidade diminuíu un 1,42%, e o dos bens intermedios, un 4,14%. Tamén baixou o custo dos bens de capital un 1,33% e o dos non enerxéticos, un 2,05%.

Mesma situación se deu nas importacións, onde os bens de consumo baixaron un 1,12% o seu prezo; os intermedios, un 10,55%, e os de capital, un 17,16%. Os non enerxéticos diminuíron de prezo un 8,82%.

En canto ao destino das exportacións, o prezo dos produtos e servizos enviados á Zona Euro desde Galicia caeu un 3,08%, mentres que a toda a Unión Europea, un 3,47%, e aos países do OCDE, un 3,1%. A mercadoría enviada ao resto do mundo encareceuse un 2,2%.

Pola súa banda, as importacións da Eurozona diminuíron de prezo un 3,87% e as da UE, un 3,63%. As do OCDE baixaron un 3,76% o custo e as do resto do mundo, un 13,16%.

Imaxe dun barco con mercadorías con productos para as importacións e exportacións | Fonte: EP - Arquivo