Galicia rexistrou un mes de marzo lixeiramente frío e moi húmido
Segundo o avance do último informe climatolóxico mensual elaborado por Meteogalicia.
Por Europa Press / Redacción | SANTIAGO DE COMPOSTELA | 07/04/2024 | Actualizada ás 12:44
Galicia rexistrou un mes de marzo lixeiramente frío e moi húmido no que respecta ás precipitacións, segundo o avance do último informe climatolóxico mensual elaborado por Meteogalicia.
Así, marzo quedou dividido en tres partes diferenciadas. A primeira e a última foron períodos onde predominaron as borrascas, o frío e húmidos, mentres que a mediados de mes houbo un período de tempo seco e cálido, pero que non contrarrestou as anomalías negativas dos outros períodos. Diso deriva que o mes teña unhas temperaturas medias lixeiramente por baixo dos valores climáticos, mentres que as precipitacións están claramente por encima.
En canto ás temperaturas, a anomalía media da temperatura para este mes, obtida a partir dos datos das 11 estacións meteorolóxicas representativas, foi de 0,2 graos inferiores ao valor normal climatolóxico, o que fai que xaneiro poida considerarse como lixeiramente frío.
En detalle, lle valor medio da temperatura máxima foi de 13,4 graos e no caso da mínima foi de 4,8 graos. Os índices máis altos --entre 16,1 e 17,2 graos-- rexistráronse en áreas do Miño en Ourense e, en Pontevedra, na Fosa de Tui e no val do río Tea. Os valores máis baixos --entre 0,6 e 2,0 graos-- foron na montaña de Ourense.
As precipitacións estiveron, segundo Meteogalicia, moi por encima do esperado en marzo ao ser frecuentes, persistentes e cuantiosas no primeiros dez días, e, a maiores, as choivas da última semana incrementaron, aínda máis, ese superávit. Por iso, a precipitación media acumulada foi de 250 litros por metro cadrado, un 148% superior ao valor climático normal.
En referencia á distribución das choivas, os valores máis altos concentráronse nas serras litorais e na comarca da Baixa Limia --entre 390 e 450 litros por metro cadrado-- mentres que os máis baixos --entre 110 e 150 litros por metro cadrado-- rexistráronse no litoral da Mariña lucense e en puntos do leste de Ourense.
