Por Europa Press / Redacción | FERROL | 13/04/2024 | Actualizada ás 17:01
O sindicato CIG presentou unha denuncia ante a Inspección de Traballo contra o grupo Ribera Salud, propietario do Hospital Juan Cardona de Ferrol, por "vulneración do dereito fundamental á folga". Segundo denuncia a central sindical nunha nota de prensa, durante unha das xornadas de folga convocadas no sector no mes de marzo, "a dirección deste centro privado decidiu substituír a unha traballadora en folga con compañeiras que habitualmente desempeñan outras actividades".
O responsable de Negociación Colectiva da CIG-Saúde, Miguel Tizón, asegurou que se trata de "unha clara práctica de esquirolaxe, posto que esa actividade non estaba marcada como servizos mínimos". "A traballadora que realiza ese servizo exerceu o seu dereito á folga e a empresa, para evitar que se paralizase a actividade, mandou a outras compañeiras a desenvolver unhas tarefas que non lle son propias. Pero substituír persoal en folga é ilegal", lembrou Tizón.
O sindicato sostén que a dirección do hospital "xa tentara unha manobra similar nas xornadas de folga previas, pero non conseguiu o seu obxectivo" pola oposición do comité de folga. Ante a paralización das negociacións do convenio provincial da sanidade privada da Coruña, as centrais sindicais teñen convocadas tres novas xornadas de folga para o luns día 15, o martes 16 e o mércores 17 de abril, que se suman ao seis xornadas previas e ás ducias de mobilizacións realizadas polo persoal desde o pasado mes de setembro en demanda de "salarios e condicións xustas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.