A Fegamp solicita unha reunión co presidente da Xunta para abordar o financiamento local e as competencias

A Federación Galega de Municipios e Provincias (Fegamp) solicitou unha reunión co presidente da Xunta para abordar asuntos "pendentes" relativos ao financiamento local, as competencias e o Servizo de Axuda no Fogar (SAF). O ente municipalista celebrou este martes unha reunión mensual da súa Comisión Executiva, composta polos 17 rexedores e rexedoras elixidos na Asemblea celebrada en novembro do pasado ano.

Na presentación do seu informe, o presidente da Fegamp, Alberto Varela, sinalou que "por fin terminou", coa investidura de Rueda, "este longo período en funcións iniciado coa convocatoria das pasadas eleccións galegas do 18 de febreiro". Por este motivo, Varela solicitará unha reunión con Alfonso Rueda para retomar os procesos suspendidos, como os traballos da comisión sobre competencias, e resolver de forma óptima todo o vinculado co financiamento local, con especial atención á situación do SAF.

Na reunión tamén se presentarán as resolucións aprobadas por consenso na Asemblea da Fegamp, na que Alberto Varela foi reelixido como presidente, para avanzar na apertura dos procesos de traballo en común que dean resposta ás demandas aprobadas polos concellos galegos.

Para o presidente da Fegamp "esta nova etapa que se inicia agora no goberno da Xunta, cos cambios coñecidos nas consellerías, ten tamén que traducirse en cambios en positivo na relación e no traballo en común cos concellos a través da súa federación". Por iso, indicou que "desde a Fegamp se aposta por explorar todas as vías posibles de colaboración, para a mellora da situación e das xestións dos concellos galegos".

Reunión da executiva da Fegamp. FEGAMP | Fonte: Europa Press