A Mesa reclama que se "garanta" o dereito de usar o galego nas comisarías de policía en Galicia

A Mesa pola Normalización Lingüística solicitou que se "garanta" o dereito a usar o galego en todas as comisarías de Galicia. Segundo apuntan nun comunicado, unha veciña de Pontevedra presentou unha queixa ao ser acusada por un axente de "faltar o respecto á autoridade por insistir no seu dereito a poder expresarse e ser atendida en galego".

Explican que, segundo a denuncia da veciña, o axente afirmou que el non entendía o galego e cuestionou o dereito da cidadanía a expresarse nesta lingua ante as institucións públicas.

Aseguran que aínda que a muller accedeu a cambiar de lingua, o axente continuou "obstaculizando" o proceso, polo que a denunciante decidiu paralizar o trámite e volver noutro momento para interpor unha queixa por "non recibir o trato adecuado nin ser atendida na lingua propia fronte a unha persoa competente en lingua galega".

Nese momento, indica, o axente interpuxo unha denuncia contra a muller por "faltar o respecto á autoridade" ao queixarse da súa actitude.

O presidente da Mesa, Marcos Maceira, lembrou que "os dereitos lingüísticos son parte dos dereitos humanos" e que "a policía tería que estar para defendelos".

Por iso, a entidade esixe ao Ministerio do Interior que se informe a todas as forzas e corpos de seguridade do Estado dos dereitos que deben defender e propón que se elabore unha campaña específica animando a usar o galego nas relacións con estes corpos.

Marcos Maceira, presidente da Mesa | Fonte: irmandade.tv