O condutor dun taxi queda ferido tras chocar contra un camión en Poio
Foi trasladado en ambulancia a un centro sanitario, mentres que o condutor do camión resultou ileso
Por E.P. | SANTIAGO DE COMPOSTELA | 17/04/2024 | Actualizada ás 20:26
O condutor dun taxi resultou ferido este mércores ao chocar o seu vehículo contra un camión no municipio pontevedrés de Poio, segundo informou o CIAE 112 Galicia.
O sinistro produciuse sobre as 15,30 horas, cando unha testemuña chamou a Emerxencias para informar da colisión entre dous vehículos, un taxi e un camión, no quilómetro 11 da PO-308. O alertante informaba de que o taxi chocara contra o camión e quedara incrustado baixo o vehículo pesado, aínda que o seu condutor non estaba atrapado.
O 112 Galicia puxo os feitos en coñecemento de Urxencias Sanitarias 061, Bombeiros de Pontevedra, GES de Sanxenxo, Garda Civil de Tráfico, Policía Local e Protección Civil de Poio.
O condutor do taxi resultou ferido o impacto, polo que foi trasladado en ambulancia a un centro sanitario, mentres que o condutor do camión resultou ileso.
Ademais dos servizos de Emerxencias, tamén interviñeron os servizos de mantemento da vía, xa que houbo que cortar a circulación momentaneamente e retirar os restos do accidente da calzada.
