A Xunta pedirá ao Goberno relaxar o rexistro de currais de autoconsumo: "Nun país no que se liberan etarras hai que rexistrar galiñas"
O Parlamento de Galicia insta á Xunta, cos votos a favor do PPdeG e de Democracia Ourensana, e as abstencións do BNG e PSdeG, a pedir ao Goberno a modificación do decreto polo que se establece o rexistro das granxas avícolas de autoconsumo.
Por Europa Press / Redacción | SANTIAGO DE COMPOSTELA | 23/04/2024 | Actualizada ás 14:58
O Parlamento de Galicia insta á Xunta, cos votos a favor do PPdeG e de Democracia Ourensana, e as abstencións do BNG e PSdeG, a pedir ao Goberno a modificación do decreto polo que se establece o rexistro das granxas avícolas de autoconsumo. A proposición non de lei, presentada polo grupo popular, elevou o ton do debate, especialmente entre os populares, que non comprenden que "nun país no que se liberan etarras e violadores, haxa que ter rexistradas as galiñas" e os nacionalistas que, xunto co PSdeG, defenderon o decreto e que censuran a actitude do populares respecto ao rural, onde lembran que faltan pediatras e acceso a internet.
Pola súa banda, o portavoz do grupo mixto, Armando Ojea (Democracia Ourensana), tamén se mostrou moi crítico cun decreto "orwelliano" que, apunta, demostra un "intervencionismo esaxerado". Así as cousas, o deputado popular Silvestre José Balseiros foi o encargado de presentar a proposta contra un decreto que, asegurou, provoca "nefastas consecuencias" no rural galego, vistos os trámites que deben levar a cabo os donos das explotacións (na súa maioría xente de avanzada idade), o que leva "unha maior carga burocrática e tamén desconfianza".
Explicou que cando se tivo coñecemento do borrador, "tentouse facer entrar en razón ao Ministerio", insistíndolles no posible "escaso cumprimento" da medida así como a súa "ineficacia", aínda en caso de cumprirse, xa que en Galicia hai "ducias de miles de currais". "Chamáronnos esaxerados", sinalou Balseiros, algo que aseverou que repetiron cando desde a Xunta falaron da "volatilidade" das granxas de autoconsumo galegas.
"O ministerio fixo caso omiso", insistiu o popular, alegando que, con todo, a Xunta púxose "ao choio" para dar "as máximas facilidades" aos donos das explotacións, co que habilitou a posibilidade de realizar os trámites a través da páxina web de Medio Rural, da Oficina Virtual Agraria; tamén deron instrucións ás oficinas físicas para que cumprimentasen os documentos e, apuntan, ata houbo concellos que colaboraron.
GARANTIR A SALUBRIDADE, CLAVE PARA PSDEG E BNG
A exalcaldesa de Lugo e agora deputada no Parlamento, Lara Méndez, estreou o seu novo cargo neste debate, lembrando en primeira instancia que o decreto estatal derívase dunha normativa europea. "Algo que non se mencionou", apostilou. A finalidade do mesmo, continuou, é mellorar a seguridade no ámbito sanitario, de benestar animal e respecto da loita contra o cambio climático e como exemplo, citou a pandemia e as súas consecuencias.
Ademais, acusou á Xunta de "xerar malestar" entre a poboación cando pode "desenvolver e adaptar" o decreto á realidade galega. "Non negamos que é un problema para a xente maior, pero o trámite pode realizarse telematicamente ou a través das oficinas do rural, que vostedes foron desmantelando, sacándolles competencias e sen persoal", aseverou.
Nesta liña, afeou que a Xunta poña de manifesto a dificultade do acceso a internet dos maiores e no rural, cando desde o Goberno galego si o implementan "para citas médicas, por exemplo, cuestións do día a día que tamén afectan á súa saúde". "Están inmersos en episodios de confrontación co Goberno central", afirmou, animándoos a "non axitar á cidadanía en contra dunha norma para a súa seguridade".
Tamén se estreou a nacionalista Ariadna Fernández, que se reivindicou como veterinaria e do rural antes de afearlle á Xunta que "ande enredando", no que os considera "especialistas". "Enmarañan para que o que aquí se coñece, trabállase, non chegue de forma directa ao seu destino", afirmou. A este respecto, lembrou que o decreto se coñece desde fai tres anos e "nese tempo a ninguén se lle ocorreu informar á poboación".
Os nacionalistas defenderon a idoneidade da medida para previr enfermidades de transmisión e poder establecer plans de vacinación, por exemplo. "Bótanlle moito peito falando de abandono do rural cando teñen a nenos sen pediatra e familias sen acceso a internet", concluíu.
UN DECRETO DE "GRAN IRMÁN" PARA OJEA
Ojea tamén se referiu a as súas orixes no rural, concretamente aos seus avós, e comentou que algúns familiares lle pediron que "proteste" no Parlamento pola medida, ao que o replicou que se trataba dun tema estatal. "Está a tentarse arranxar o que non rompeu. É un caso de hipertrofia burocrática totalmente innecesaria (...). En Madrid non coñecen a realidade do rural galego, e non só neste caso", aseverou.
Para o deputado de DO, "as normas fanse sobre todo cando a conduta das persoas pode interferir na de terceiros", pero "se un matrimonio maior ten unhas galiñas para consumir os seus propios ovos", Ojea "non ve que haxa un problema nin nada que normativizar". Mesmo foi máis aló, tachando a medida de "orwelliana", xa que lle lembra ao "Grande Irmán do Estado que o quere ter todo controlado". "Trátase dun intervencionismo esaxerado do Estado, non lle vexo sentido ningún", insistiu. O deputado popular foi o último en intervir no debate da proposición. "Non é fácil entender que nun país no que se liberan etarras, violadores e aos que atentan contra a constitución, haxa que ter rexistradas ás galiñas", concluíu.
