O PPdeG defende "desvincular" violencia machista e igualdade en dúas direccións xerais: "É unha aposta forte"

A secretaria xeral do PPdeG, Paula Prado, defendeu este xoves, fronte ás críticas de BNG e PSdeG, a decisión do presidente galego, Alfonso Rueda, de suprimir a Secretaría Xeral de Igualdade na novo organigrama da Xunta e crear dúas direccións xerais diferenciadas para Loita contra a Violencia de Xénero e Promoción da Igualdade.

Mentres que a oposición cargou contra o que ve "unha degradación" e un erro no enfoque ao desligar ambas as áreas, Prado, en declaracións aos medios antes de reunirse con deputados e senadores do partido, esgrimiu que non atopa "ningún argumento sólido" para "xusticiar" as denuncias de "suposta degradación". Lonxe diso, reivindicou que "está claro" que o Goberno autonómico "fixo unha aposta importantísima pola igualdade, cunha dirección xeral específica para a promoción da mesma" e engadiu que combater a violencia de xénero é tamén "algo fundamental na sociedade".

PRADO NON VE "XUSTIFICACIÓN" ÁS CRÍTICAS

"Pero desvincular a loita contra a violencia de xénero da promoción da igualdade non é simplemente polos equipos directivos, senón que é unha cuestión de centrarse nos problemas reais desta sociedade. Creo que é unha aposta forte ter dúas direccións xerais", proclamou. "Non vexo xustificación en pór o foco nunha suposta degradación sen ningún tipo de argumento", concluíu.

REIVINDICACIÓN DO TRABALLO DE DEPUTADOS E SENADORES

Por outra banda, a secretaria xeral do PPdeG encabezou este xoves unha reunión de traballo cos deputados e senadores galegos do partido na que reivindicou o labor que cada día fan nas Cortes Xerais "defendendo Galicia con propostas fronte ás críticas" e, "con proxectos fronte aos insultos, devolvendo aos galegos a confianza que depositaron neles".

"Están cada día levando a iniciativa das cuestións que preocupan aos galegos e que dependen dun Goberno de España que segue sen cumprir con Galicia", explicou, citando asuntos que, ao seu modo de ver, supoñen "ataques frontais" a Galicia, como a transferencia da AP-9, as competencias de xestión do litoral, os fondos europeos ou a chegada da alta velocidade.

No polo oposto, en declaracións aos medios, antes de reunirse precisamente cos representantes do PPdeG en Congreso e Senado, subliñou que todas estas cuestións "protagonizan" as preguntas e as iniciativas impulsadas polos populares da comunidade nas Cortes. O seu labor, esgrimiu, "contrasta cualitativa e cuantitativamente co "seguidismo absoluto a Pedro Sánchez dos 15 representantes da esquerda nas Cortes Xerais".

"Os representantes do PPdeG son o contrapeso a un Sánchez que desapareceu cinco días pero leva anos desaparecido de Galicia e o contrapeso tamén a esas cortinas de fume que cada día levantan os ministerios para non dar explicacións de por que non avanzan os temas importantes para Galicia", remarcou.

OS CINCO DÍAS DE REFLEXIÓN DE SÁNCHEZ: "OBRA DE TEATRO"

Precisamente, en referencia aos cinco días de reflexión do presidente do Goberno, que posteriormente compareceu para anunciar que non dimitiría, Paula Prado concluíu que se tratou "dunha obra de teatro cun guión moi claro". Finalmente, augurou que "este suposto punto e aparte en nada beneficiará a Galicia e en nada fará avanzar as cuestións que preocupan e ocupan aos galegos".