O Goberno tramita a impugnación do cesamento do interventor no Concello de Ourense
Así o informaron desde a Delegación do Goberno en Galicia, onde recibiron un oficio do ministerio no que pon os feitos en coñecemento para que tomen medidas
Por Europa Press / Redacción | SANTIAGO DE COMPOSTELA | 15/05/2024 | Actualizada ás 20:23
O Ministerio para a Transformación Dixital e a Función Pública notificou o inicio dos trámites para impugnar a decisión tomada polo rexedor municipal de Ourense, Gonzalo Pérez Jacome, de cesar ao interventor municipal.
Trátase dun funcionario con habilitación de carácter nacional que accedeu, ademais, ao seu posto por concurso, polo que é necesario o apoio da Administración Xeral do Estado para levar a cabo este cesamento, que desde o Ministerio decidiron impugnar.
Así o informaron desde a Delegación do Goberno en Galicia, onde recibiron un oficio do ministerio no que pon os feitos en coñecemento para que tomen medidas.
Desde a Delegación explican que xa requiriron ao concello a documentación na que sustentan o cesamento do funcionario porque aseguran que os concellos "teñen a obrigación de remitir todos os acordos que tomen por se afectan á legalidade vixente".
Respecto diso, explican que polo momento non recibiron nada. Unha vez teñan a notificación do acordo, será estudado para a súa posterior decisión, entre elas a posibilidade dun recurso contencioso administrativo.
