Amarante Setem e Roupa Limpa estrean “Fíos Fóra”, un documental coral sobre as obreiras do sector do téxtil galego
A produtora Illa Bufarda foi a encargada de elaborar o documental.
Por amarante (http://www.amarantesetem.org) | GC ABERTO | 24/10/2015
Por moi finos que sexan, detrás de todos os fíos que nos rodean hai historias. As mulleres galegas que traballaron no sector téxtil dende os 60 foron a man de obra perfecta e cautiva para erguer unha industria xigante que agora se atopa deslocalizada. Este documental fai un novelo do sector téxtil aquí e fóra, antes e agora. A historia repítese nos fíos doutros lugares, nos nós deste sistema.
Con esta sinopse, AMARANTE Setem e a Campaña Roupa Limpa queren presentarvos o seu documental “Fíos Fora, historias de obreiras, entre costuras e patróns”, que dende as conversas de moitas persoas protagonistas narra o que foi o sector do téxtil galego dende seus nacementos ata a súa deslocalización e o impacto deste modelo industrial.
Illa Bufarda foi a produtora creativa encargada de levar a cabo esta longametraxe documental diversa en voces e protagonistas, onde participaron ex traballadoras do téxtil en Galicia, personaxes vencellados ó sector empresarial e aos talleres e traballadoras do téxtil en Marrocos, entre outras moitas.
Este documental, que estará dispoñible en galego, castelán e inglés queremos que sexa unha porta aberta ao debate. Fálase moito dos grandes beneficios desta industria pero pouco dos milleiros de traballadoras que o fan posible e en que condicións o fan.
Realizaremos a súa estrea Internacional en A Coruña, cidade e provincia con gran referencia no sector industrial e outra en Pontevedra, sede da organización.
O documental estará presente en varios festivais cinematográficos e está previsto realizar máis proxeccións ó longo do territorio galego, noutras cidades do estado español e a nivel internacional.
A continuación vos deixamos a axenda das datas e programación prevista para o mes de novembro que continuará nos vindeiros meses por máis cidades e vilas.
Estrea Internacional en Coruña:
Auditorio do Centro Ágora: Xoves 12 de Novembro ás 19:45h
Actuación de Mónica de Nut e proxección de Fíos Fóra.
Coloquio aberto coas traballadoras protagonistas, Amarante e Illa Bufarda.
Segunda Estrea en Pontevedra:
Teatro Principal: Venres 13 de Novembro ás 20:00h
Coloquio aberto coas traballadoras protagonistas, Amarante e Illa Bufarda.
En canto as proxeccións en festivais, temos as seguintes:
Cine Europa en Santiago (con datas pendentes de confirmación)
OUFF-Ourense Film Festival: Mércores 18 de novembro ás 20:30h
Para máis información podedes consultar os seguintes enlaces:
Agardámosvos a todos nas estreas!
O documental culmina un proxecto de 3 anos adicado a formación e sensibilización sobre a feminización da pobreza no sector téxtil, a denuncia sobre as condicións de explotación das traballadoras e as alternativas para un consumo responsable de roupa. Este traballo foi financiado pola Subdirección Xeral de Cooperación Exterior da Xunta de Galicia e a UE.
