O BNG cobrará 10 euros extra aos seus militantes para afrontar a campaña do 20D
A formación nacionalista non subscribirá ningún crédito con entidade bancaria ou financeira, “nin recursos procedentes de bancos, nin de lobbies, nin de corporacións económicas”, tampouco “de partidos ou de organizacións de fóra de Galiza”.
Por Galicia Confidencial | Compostela | 13/11/2015 | Actualizada ás 18:00
O BNG decidiu facer fronte aos custes da campaña electoral de Nós Candidatura Galega para as xerais do 20D cunha cota extra de 10 euros que cobrará a cada militante desde decembro de 2015 a maio de 2016.
Foi unha decisión adoptada pola Executiva Nacionalista e que deu a coñecer esta semana aos seus militantes, aos que lembrou que, para esta campaña non se subscribirá ningún crédito bancario nin cartos de “lobbies, bancos ou corporacións financieiras”. “Esta achega resulta imprescindíbel para desenvolver unha campaña digna, coa orientación e limitacións expresadas con anterioridade”, sinala o comunicado ao que tivo acceso GC.
En todo caso, a formación nacionalista anuncia que responsables locais e comarcais do BNG poranse en contacto cos militantes, durante este novembro, co fin de informar do termos exactos desta iniciativa. “A cota é voluntaria, e comprendemos a existencia de casos nos que sexa preciso eximir a compañeiras e compañeiros desta cota por razóns económicas”, sinala o escrito.
Ademais, o BNG anima a aqueles militantes que, “no caso de ser economicamente posíbel”, realizaren achegas de importe superior, pola vía da doazón. “Somos conscientes de que estamos a vivir momentos moi duros, que tamén nos afectan economicamente a nivel individual. Con todo, tamén son estes momentos nos que cómpre reaxir, e nos que se demanda determinación e compromiso militante. De certo que coa túa participación activa conquistaremos os nosos obxectivos políticos. É o que o noso pobo espera de nós”, engade.
A Executiva nacionalista suliña que, para esta campaña, non se subscribirá ningún crédito con entidade bancaria ou financeira, “nin recursos procedentes de bancos, nin de lobbies, nin de corporacións económicas”. E aclaran, “tampouco de partidos ou de organizacións de fóra de Galiza”, en relación a formacións que participan da outra gran candidatura da esquerda galega, En Marea, na que participa Esquerda Unida e Podemos
Ademais, o BNG destaca que non se enviará correo masivo (“mailing”) ao electorado. “Este elemento será substituído por un intenso traballo de rúa. Ademais, razóns de aforro económico público, de respecto ambiental e de limpeza democrática fundamentan a nosa aposta por esta vía”, aclara.
Por iso, insiste en que a campaña electoral estará fundamentada no traballo militante. “As limitacións económicas e as restricións en soportes publicitarios van poder ser superadas só polo activismo, a entrega e o esforzo militante, a organización e a vontade de innovación e imaxinación”, precisa.
