(Vídeo) Segredos da Ponte Maceira, unha das vilas máis bonitas de España por onde tamén pasou o Apóstolo Santiago

A Ponte Maceira, unha pequena vila situada no límite entre os concellos de Ames e Negreira é un dos puntos de paso dos peregrinos que realizan o Camiño de Santiago e deciden continuar cara Finisterre, para o que teñen que salvar o río Tambre. Sen embargo, dende hai uns anos, tamén se convertiu nunha das vilas máis bonitas de España, obtendo tal recoñecemento no 2019. A súa beleza natural singular e a preservación das súas construcións arquitectónicas confírenlle un atractivo especial. Entrar na Ponte Maceira é como trasladarse a outra época, onde a calma reinaba fronte ás présas da sociedade moderna, é escoitar o son da auga correr e os páxaros chiar.

Sen dúbida, o primeiro que chama a atención do visitante que chega a esta aldeíña galega é a súa gran ponte, que comunica ambas marxes do río Tambre. As orixes desta ponte, coñecida tamén como 'A Ponte Vella' hai quen di que mesmo se remontan á época romana, aínda que a obra actual, levantada sobre os piares da primitiva construción, dataría de entre finais do século XIII e comezos do XIV por encargo da Mitra Compostelana, co fin de mellorar as comunicacións entre Santiago e o litoral. Posteriormente no século XVIII foi obxecto dunha serie de reformas para subsanar desperfectos provocados por varias riadas e desbordamentos do Tambre. Conta co prototípico perfil de 'lombo de burro', característico das pontes medievais. Ademais, a calzada que o atravesa ten nada menos que tres metros de anchura.

Conta a lenda que tras morrer o Apóstolo Santiago os seus discípulos fuxían duns soldados romanos cos seus restos con intención de dárlles sepultura e que, unha vez cruzaron a ponte, esta veuse abaixo milagrosamente. Máis documentada está na Historia Compostelana a loita que na contorna da Ponte Maceira libraron os exércitos do Bispo Xelmírez e os da influínte casa nobiliaria galega de Traba, con Don Pedro Froilaz e os seus fillos Bermudo e Fernando á cabeza. Ademais da ponte, completan o conxunto monumental o Pazo de Baladrón, de propiedade privada, varios muíños e a capela do século XVIII de San Brais, á que se lle engadiu en época máis recente unha ábsida neorrománica.

 

 

 

 

Ver esta publicación en Instagram

 

 

 

 

 

 

 

 

 

 

 

Una publicación compartida de Galicia Confidencial (@galicia_confidencial)