En Marea e Ciudadanos entrarían por Galicia, Nós quedaría fóra
A estimación do reparto de escanos que fai o CIS para Galicia depara grandes sorpresas. Importante irrupción das mareas, entra Ciudadanos e saída das Cortes dos representantes do BNG, fronte integrado na coalición Nós Candidatura Galega. Feijóo di que o PP gaña por "maioría absoluta".
Por Galicia Confidencial | Madrid | 03/12/2015 | Actualizada ás 13:58
O Partido Popular gañaría as eleccións con 14 deputados (3 na Coruña, 3 en Pontevedra, 2 en Lugo e 2 en A Coruña).
O PSOE ou En Marea estarían en segundo lugar. Os socialistas sacarían 5 ou 6 escanos (2 na Coruña, 1 ou 2 en Pontevedra, 1 en Lugo e 1 en Ourense).
Tamén 5 ou 6 para En Marea, que suma a ANOVA, EU, Podemos e varias mareas municipais. Esta forza irrumpe con 2 na Coruña, 1 en Pontevedra, 1 en Lugo, 1 en Ourense e disputa ao PSOE o segundo en Pontevedra.
Outra sorpresa é a irrupción de Ciudadanos. O CIS dálle un escano pola Coruña e outro por Pontevedra.
Nas notas introdutorias do barómetro, o CIS di no estudio que o traballo de campo non se fixo a tempo para ter en conta a Nós-Candidatura Galega.Con todo, o instituto público preguntou polo seu "compoñente maioritario", o BNG. O Bloque suma o 0,1% en intención de voto estatal, quedándose fóra das Cortes, onde agora ten dous representantes.
A nivel estatal, Mariano Rajoy gañaría as eleccións e obtería entre 120-128 escanos. O PP lonxe da maioría absoluta, estaría capacitado para gobernar en solitario con apoios.
Como segunda forza mantense o PSOE, que caería por baixo dos 90 escanos. Ciudadanos lograría entre 63 e 66 deputados mentres que Podemos, xunto ás coalicións nas que participa nas comunidades autónomas, alcanzaría entre 45 e 57 escanos.
O CIS é historicamente a máis acertada das enquisas preleecotorais.
Reaccións
O presidente galego, Alberto Núñez Feijóo, referiuse este xoves aos datos do CIS e suliñou que, a pesar da gran baixada que experimenta o seu partido, o PP é o “gran gañador” das eleccións xerais en Galicia. “Imos repetir unha nova vitoria electoral”, indicou.
Así, dixo que os datos do CIS apuntan a que o PSOE “tamén baixa” e que o BNG “desaparece”. “E de todo iso se benefician as mareas e Ciudadanos que conseguirían escano”, apuntou. Con todo, Feijóo quixo quedar co dato positivo de que o seu partido terá a “maioría dos votos” para contribuír a unha vitoria electoral do PP no Estado.
“Seguimos como forza maioritaria e segundo o CIS gañamos as eleccións. Por iso hai que estar motivado para acadar a maioría absoluta”, indicou.
