Os voluntarios de Protección Civil en Galicia participaron en máis de 48.000 operativos en 2023
Cunha media diaria de máis de 132 intervencións.
Por Europa Press / Redacción | SANTIAGO DE COMPOSTELA | 20/08/2024 | Actualizada ás 14:30
As Agrupacións de Voluntarios de Protección Civil (AVPC) galegas participaron nun total de 48.179 operativos ao longo de 2023, cunha media diaria de máis de 132 intervencións.
Segundo detallou a Xunta, as actuacións centráronse na súa maioría en accidentes de tráfico, con case o 35%, ademais de en incidentes relacionados con animais, incendios, rescates e operativos sanitarios e de seguridade.
Así mesmo, tamén realizaron asistencias en festivais, eventos deportivos e outras concentracións masivas, para o correcto desenvolvemento da programación e evitar riscos. De feito, un 25% das actuacións realizadas polas AVPC tiveron lugar en fins de semana e datas específicas. En 2023, os colectivos de agrupacións de voluntarios de Protección Civil presentes en Galicia ascenderon ata os 235, "máximo histórico".
Para un desenvolvemento eficaz do seu traballo, a Xunta destina a estas agrupacións máis de 20 millóns de euros a través de diferentes íneas de axudas. En concreto, este financiamento permitiu adquirir novos vehículos, equipos de protección individual e ferramentas tecnolóxicas avanzadas a favor da capacidade operativa e a seguridade do persoal voluntario.
Tamén contan cunha liña anual de axudas destinada ao mantemento da súa actividade, que ascende a 340.000 euros e que só este ano beneficiou a preto de 200 colectivos.
A formación é outro dos alicerces do apoio do Goberno galego ás AVPC, con cursos específicos impartidos a través da Academia Galega de Seguridade Pública (Agasp). Ao longo do último ano houbo case un centenar de accións formativas nas que participaron 2.000 persoas.
