Rueda: "Podemos facer fronte á campaña dos lumes cos medios que temos"
Recoñece que o dispositivo é "moi amplo" pero que "non se pode baixar a garda".
Por Galicia Confidencial | Compostela | 10/09/2024 | Actualizada ás 08:30
A Xunta segue presumindo de medios de loita contra os incendios forestais tras os grandes lumes de Entrimo e Crecente que calcinaron a pasada semana máis de 500 hectáreas, a metade delas no parque natural do Xurés e que no caso do concello pontevedrés obligou a desaloxar varias aldeas por precaución. "Podemos facer fronte á campaña dos lumes cos medios que temos", destacou o presidente galego.
Preguntado na rolda de prensa posterior ao Consello da Xunta sobre os últimos grandes lumes, Alfonso Rueda destacou os medios empregados nestes incendios e suliñou que, "aínda que non hai que baixar a garda porque a experiencia di que hai grandes lumes en outuno", o dispositivo é "moi amplo". "Conta con máis de 7.000 persoas", apuntou.
O xefe do Executivo galego recoñeceu que este verán foi bo en canto a incendios porque "tamén houbo climatoloxía bastante boa", para que non proliferaran. "En todo caso, non hai que baixar a garda, manteremos os efectivos e se hai que aumentalos, temos flexibilidade para facelo", indicou. "Pero quero pensar que cos medios que temos podemos facer fronte á campaña de incendios deste ano", concluíu.
