A extinción dos contratos do programa María Zambrano fai que invesigadores da USC pidan unha solución
"A perda destes impulsos científicos representará un prexuízo significativo para as nosas universidades, para a comunidade científica, así como para os territorios nos que nos inscribimos", aseveran nun comunicado
Por E.P. | SANTIAGO DE COMPOSTELA | 19/09/2024 | Actualizada ás 20:07
Investigadores e investigadoras que desempeñan o seu traballo na USC a través do programa María Zambrano urxiron ás administracións que acheguen solucións ante a "inminente extinción" dos seus contratos que, ademais de deixar no aire o futuro profesional, ameaza a continuidade dos seus proxectos.
Nun comunicado remitido aos medios este venres, o grupo que participa na USC por este programa do Goberno central enfocado a reter talento a través de bolsas para investigadores que desenvolvían a súa carreira no estranxeiro denuncian que a iniciativa "non está a cumprir coa súa función de establecer unha política efectiva de recualificación do sistema universitario".
Afirman que a convocatoria "acabou convertida nunha proposta de atracción temporal de talento" que, coa extinción dos seus contratos, "ameaza" con expulsalos de novo do sistema universitario español.
Sosteñen que as consultas e reunións mantidas co Ministerio de Ciencia, Innovación e Universidades, a Universidade de Santiago de Compostela, Universidade de Vigo, Universidade da Coruña, e a Consellería de Educación Ciencia, Universidades e Formación Profesional "non deron, ata agora, resposta nin solución" á súa problemática.
Por todo iso, reclaman unha prórroga dos seus contratos para poder "consolidar" os proxectos iniciados, algúns dos cales están pendentes de resposta ante peticións de financiamento nacional e internacion.
"Todo iso nace e morre connosco. A perda destes impulsos científicos representará un prexuízo significativo para as nosas universidades, para a comunidade científica, así como para os territorios nos que nos inscribimos", aseveran no seu comunicado.
Pon como exemplo as decisións de institucións académicas como a Universidade de Salamanca, que prorrogou os contratos dos participantes no programa María Zambrano, ou a Universidade de Vigo, que tamén explora vías para prolongar a vinculación dos investigadores.
"Entendemos que existen posibilidades para afianzar aos investigadores nos seus equipos e reclamamos que sexan exploradas canto antes. Queremos seguir traballando na recualificación do sistema universitario e contribuíndo ás comunidades nas que traballamos", conclúen.
