Don Disfraz, unha empresa galega que no entroido compite con Amazon

A empresa, establecida en Ponteareas, é líder na venda de disfraces e complementos e ten previsto contratar a máis de 60 persoas nestas datas. Prevé vender até 100.000 disfraces.

Por X.M. Fernández | Ponteareas | 19/01/2016 | Actualizada ás 17:00

O entroido é sinónimo de festa, troula e ledicia e diso saben moito e ben os responsables desta singular empresa. Con máis de 20 anos ás costas e tendo comezado cunha tenda local en Ponteareas, agora ocupa xa máis de 3.000 metros cadrados e di que ten previsto contratar a máis de 60 persoas nestas datas.

Cun catálogo de máis de 15.000 referencias vende agora a España, Francia, Bélxica e Luxemburgo e ten planeado vender nos vindeiros meses a Alemaña e Italia.

Don Disfraz, líder online no sector da venda de disfraces e complementos, espera bater os seus propios records e, tal como xa aconteceu en Halloween, chegar a dobrar as vendas. "Esperamos vender máis de 100.000 disfraces nesta campaña de carnaval" dinos Roberto, xerente da empresa, o que suporá vestir a 1 de cada 4 dos compradores online de disfraces en Carnaval.

Competir con tantos “monstros” do negocio en liña e bazares non é tarefa doada, pero Don Disfraz resiste e medra como empresa sólida no sector no que está tan especializada. Cal será o seu segredo? Posiblemente o gran catálogo e a mestura de intuición, experiencia e bo trato ao cliente.

5 Marisa

Sinto que non fagan a propaganda e a venda na NOSA LINGOA. A desculpa de que vende para outros países, non é válida; hai poner a opción de " traducir", asunto resolto. Sorte!!!!!

1 Ghalo de Mondariz

Polo contrario os empregados sí somos galegos e falamos en galego...

4 Farrapeiro

Eu penso que unha empresa é para facer cartos, non para promocionar a cultura. Cando vós montedes o voso neghosio xa o faredes priorizando os temas culturais, pero a verdá é que é un orghullo ver que empresarios galegos saen adiante e captan a atención dos medios de comunicación. O caso é competir.

3 Daniel

¿Que non utiliza o galego? Pois claro, se ti queres vender só en Galicia utilizas o galego, pero si queres vender no resto do mundo terás que facelo mais universal, que é o que fan eles, poñer a web en castelán, francés e inglés. Pero claro, vos mercaredes en Amazon que eses sí que o poñen todo en galego ¿non sí? Que pouca visión.

2 eusi

Tenhem muito bons preços embora os fretes son algo elevados, e tamém reivindico o uso do noso idioma, esa foi umha das causas polas que nom merquei nada ainda, mágoa por eles/as.