O Partido Comunista de Galicia quere un espazo que rompa co capitalismo
Os comunistas galegos celebran a Conferencia Galega para preparar 1ª fase do Congreso do Partido Comunista de España.
Por Galicia Confidencial | Vigo | 20/03/2016 | Actualizada ás 13:00
O Partido Comunista de Galicia (PCG) traballa para articular un movemento político e social de ruptura co actual réxime político e co sistema capitalista. Así se puxo de manifesto na Conferencia da 1ª Fase do Congreso do Partido Comunista de España (PCE), que será o vindeiro 9 de abril en Madrid.
A xuntanza, que tivo lugar este sábado, contou cunha importante participación da militancia. Entre os participantes, que deron os saúdos iniciais, estaban Xosé Enrique Porto, en representación da SOGAPS – que animou e recoñeceu o traballo incansable de solidariedade das e dos comunistas coa causa saharaui -, Xosé Manuel Sánchez Aguión, secretario xeral do Sindicato Nacional de CCOO de Galicia, Mónica Sánchez Montes, cónsul de Venezuela, e do presidente de honra do PCG, Manuel Peña Rey.
Ao longo da conferencia leváronse a cabo o debate e votación das emendas e resolucións tratadas previamente nas agrupacións, así como a elección da delegación que se enviará desde Galicia á 1ª fase do Congreso do PCE, que será a encargada de levar as conclusións do debate galego.
