A Illa de Arousa restrinxirá a circulación de turistas e foráneos durante o verán

O concello pontevedrés da Illa de Arousa establecerá este verán diferentes medidas na circulación co obxectivo de facer fronte á masificación de tráfico durante a tempada estival. "As novas medidas teñen como obxectivo mellorar a mobilidade e a calidade de vida dos nosos veciños, creando unha contorna máis segura e cómodo para todos", sinalou o alcalde da Illa, Luís Arousa.

Desta forma, o Concello propón establecer un autobús lanzadeira entre O Bao, Area da Secada e Carreirón, co obxectivo de mellorar a conectividade e permitir aos veciños e visitantes desprazarse "de forma cómoda e eficiente". Outra das medidas pasa pola creación dunha zona azul, que será gratis para os residentes, na praia de Area da Secada. Esta implantación será un proxecto piloto co fin de avaliar o seu funcionamento para implantalo noutras zonas de alta demanda.

Tamén haberá restricións no tráfico rodado de vehículos non empadroados nas zonas residencial de centro urbano. Así mesmo, esta medida busca promover un mellor ambiente para os peóns e mellorar a seguridade viaria nas zonas de maior concentración de vivendas. Desde o consistorio puntualizaron que esta medida "non afectará" os vehículos que necesiten acceder a vivendas de uso turísticos, hoteis, pensións e comercios locais.

Finalmente, o Concello reunirase, nos próximos días, cos veciños das rúas Lagartiño e Chasán para presentar as propostas de cambios de sentido de tráfico na zona.

Imaxe aérea da Illa de Arousa durante a celebración do Atlantic Fest | Fonte: ATLANTIC FEST