O alcalde de Cuntis tópase cunha chea de bolsas con plantas de marihuana en estado de descomposición
O representante municipal cifra en máis de 200 as plantas achadas --segundo o reconto que puideron realizar--, ademais de ao redor de 20 "máis pequeniñas".
Por Europa Press / Redacción | PONTEVEDRA | 25/03/2025 | Actualizada ás 14:53
O alcalde de Cuntis, Manuel Campos, atopouse a tarde do luns cunha trintena de bolsas de lixo apiladas con diferentes restos vexetais, das cales 23 delas contiñan "pequenas" plantas de marihuana. Fontes da Garda Civil de Pontevedra detallaron a Europa Press que as plantas de marihuana, localizadas na zona de Vilariño, estaban "en avanzado estado de putrefacción".
Pola súa banda o rexedor relatou que conducía pola contorna ata que se fixou na pila de bolsas, que tamén contiñan substratos de sementes. O representante municipal cifra en máis de 200 as plantas achadas --segundo o reconto que puideron realizar--, ademais de ao redor de 20 "máis pequeniñas".
O rexedor cre que o contido "debeu de ser depositado alí entre o sábado noite e o domingo", polo que estima que só debía levar un día situado alí. Sobre o seu estado, opina que "non estaban podrecidas do todo, senón que estaban murchas, tamén de estar dentro da bolsa". Ademais, insiste en que "cheiraban unha chea". Unha vez os operarios municipais trasladaron o aviso á Garda Civil, esta encárgase agora de investigar a orixe da plantación, que aínda se descoñece.
