"Ven a mi cumple", o festival que celebra os 10 anos da canle infantil Clan, chega a Pontevedra
Un espectáculo para toda a familia cos personaxes máis queridos da canle pública estatal.
Por GC Tendencias | Pontevedra | 27/04/2016 | Actualizada ás 18:00
O Auditorio Sede Afundación de Pontevedra (Augusto González Besada, 2) acolle o vindeiro domingo, 1 de maio, en dúas funcións, ás 12.00 e ás 17.00 h, o espectáculo Ven a mi cumple que celebra o décimo aniversario da canle infantil de Televisión Española, Clan TV. As entradas poden adquirirse en Ataquilla.com.
Dirixido a toda a familia, Ven a mi cumple presenta os personaxes máis queridos da canle nun show que combina música, teatro e humor, para que pequenos e maiores o pasen en grande. Así, da man dos Lunnis, Pocoyó, Caillou, Elly, Pato ou Heidi, celebrarán uns aniversario moi especial.
O espectáculo, desenvolvido por Pandora Producciones en colaboración con Lemon Live Entertainment, pasou polos escenarios de grandes teatros e pavillóns de toda España, que se converten no propio estudio de gravación de Clan, onde son recibidos todos os invitados da familia.
