Forenses protestan contra a Xunta por ter gardas "24 horas durante sete días"
Non descartan ir aos tribunais.
Por Europa Press / Redacción | SANTIAGO DE COMPOSTELA | 09/04/2025 | Actualizada ás 11:11
Médicos forenses de Galicia piden a redución das súas gardas, que actualmente duran unha semana enteira, a unha única xornada e advirten de que poderían levar o asunto aos tribunais no caso de que non se chegue a un acordo, xa que alegan que son os únicos da súa especialidade en España aos que non se lles recoñeceu a implantación das gardas de 24 horas.
"Soportamos unha semana enteira de garda (24 horas ao día durante sete días), sen descansos, con desprazamentos que en non poucas ocasións superan os 200 quilómetros e a calquera hora do día e da noite", advirte este colectivo profesional nun comunicado asinado polo presidente da Asociación Galega de Médicos Forenses (AGMF), Fernando Serrulla.
Ademais, subliñan que o traballo de garda "págao a Xunta de Galicia a 1,42 euros netos por hora sen distinción de festivos ou laborais". O motivo do traslado, explican, pode ser levantar un cadáver, atender unha agresión sexual ou asistir a un detido, entre outros, xa que a súa tarefa consiste en colaborar con xuíces, maxistrados e fiscais na resolución de conflitos "nos que hai algunha cuestión médica ou biolóxica que pode influír nas decisións que teñen que tomar".
No comunicado, estes profesionais explican que poden ser requiridos para un desprazamento "a calquera hora do día ou da noite por todo o territorio de Galicia, haxa temporal, onda de calor, frío, vento ou neve" e "en domicilios, camiños, estradas, montes, ríos ou praias".
O Ministerio de Xustiza recoñeceu en 2019 esta demanda do colectivo cunha resolución que reorganizaba as gardas e reducíaas a 24 horas. "Non entendemos cal é a lei que rexe en España para todos os médicos forenses que en Galicia non pode aplicarse", quéixanse.
