Gómez Caamaño afirma que os protocolos de seguridade están sendo revisados para "protexer os sanitarios"
Tanto as agresións a sanitarios como o plan de recursos humanos foron temas tratados na reunión que o conselleiro mantivo coa Valedora do Pobo, Dores Fernández Galiño, este xoves na capital galega
Por Europa Press / Redacción | SANTIAGO DE COMPOSTELA | 11/04/2025 | Actualizada ás 14:35
O conselleiro de Sanidade, Antonio Gómez Caamaño, asegurou que a Consellería está "a facer unha revisión dos protocolos" para tratar de "protexer aos profesionais sanitarios" de agresións.
Así se manifestou a preguntas dos medios tras reunirse coa Valedora do Pobo e despois de que leste mesmo venres a xunta de persoal da área sanitaria da Coruña entregase firmas para reclamar medidas de seguridade e protocolos para evitar agresións.
Tal e como expuxo o conselleiro, o departamento autonómico "fixo un máximo esforzo" por tomar "múltiples medidas para protexer aos profesionais". Unhas medidas entre as que mencionou a modificación da Lei de Saúde, programas de educación sanitaria, así como reunións con axentes implicados, Fiscalía, técnicos, entre outros. "Máis non se pode facer e os resultados veranse co tempo", reflexionou Gómez Caamaño.
Neste punto, sinalou que realizan "unha revisión dos protocolos", algúns deles, dixo, "específicos de cada área e outros a nivel máis global", aínda que non concretou data de publicación.
Doutra banda, preguntado polo Plan de Recursos Humanos anunciado, o conselleiro avanzou que están "na última fase" e que agora se está "analizando globalmente".
REUNIÓN COA VALEDORA
Tanto as agresións a sanitarios como o plan de recursos humanos foron temas tratados na reunión que o conselleiro mantivo coa Valedora do Pobo, Dores Fernández Galiño, este xoves na capital galega.
Ademais, outro dos asuntos dos que falaron e que xeran máis queixas foron as listas de espera, así como "a falta de profesionais".
En concreto, o conselleiro, que cualificou a reunión de "frutífera e pertinente", trasladou que informou á Valedora de "todas as medidas" que implementa a Consellería para "tentar axilizar e mellorar os tempos de atención", ademais de "por que se producen" as listas de espera.
Así mesmo, a preguntas dos medios tras a reunión, Gómez Caamaño recoñeceu que as probas complementarias "xeran moita inquietude na xente", polo que destacou que a Xunta quere "facer unha especie de proxectos específicos en relación a tempos de espera a determinadas probas" deste tipo.
"Temos un problema dunha organización que pode ser mellorable desde o punto de vista de eficiencia do sistema. Hai moitas probas que se poderían acelerar facendo pequenas modificacións. Sabemos que se melloras os tempos de espera de probas complementarias a percepción é mellor, sen ningunha dúbida", subliñou.
MELLORAR A COMUNICACIÓN
En canto á comunicación das derivacións a centros concertados, o conselleiro apuntou que "hai que mellorar a comunicación" e explicar "por que son eses tempos de espera e os mecanismos que se teñen cando quérenche derivar a un concertado e as implicacións que iso ten".
"A maior parte dos problemas, a xente se ten boa información, o grao de queixa sempre é baixo", manifestou antes de insistir en que deben "mellorar a comunicación do tempo de espera non estrutural, que a xente que estea aí explicarlles cal é o mecanismo real para pasar a unha lista estrutural".
Nesta liña, Gómez Caamaño lamentou que "hai moita xente" que está nesas listas de espera e "realmente non ten que estar".
Sobre isto, a preguntas dos xornalistas, o conselleiro detallou que hai cidadáns que "nun momento meteullos nunha lista de espera que igual non lle fai falta a intervención neste momento", ejemplificando casos como xente que se chama para operar "e non queren, polo motivo que sexa", que non poden operarse por un motivo médico doutro tipo, que se lles ofrece operarse nun concertado e queren un público, ou que se lle ofrece nun público e queren noutro.
Tamén aseverou que a Consellería comunica os tempos de espera "adaptándose á normativa". "Nós non mentimos, os datos son os datos; non enganamos", reiterou recoñecendo en que teñen que "facer un esforzo por comunicar mellor que implica unha lista de espera non estrutural".
Pola súa banda, a Valedora sinalou que a reunión se celebrou en "un ton de máxima colaboración" e que serviu para "formalizar a relación directa" entre ambas as institucións que, recoñeceu, "están en permanente colaboración".
